Улсын онцгой комиссын шийдвэрээр өнөөдөр өглөөний 08:00 цагт ОХУ-ын нийслэл Москва хотоос “ОМ-136” дугаарын нислэгээр МИАТ ТӨХК-ийн онгоц 231 иргэнээ авчирсныг Гадаад харилцааны сайд Д.Цогтбаатар мэдээлжээ. Мөн Улаанбаатар-Токио чиглэлд “ОМ-501” дугаарын нислэг өглөөний 08:55 цагт хөөрсөн. Онгоц өдрийн 14:30 цагт Монголд буух товтой байна. Өчигдөр буюу III сарын 15-нд Сөүл-Улаанбаатар чиглэлийн тусгай үүргийн онгоцоор 244 иргэнийг нисэх буудлаас хүлээн авч 14 хоног "Энх саран" сувиллын газар, Цэргийн төв эмнэлэг, ХӨСҮТ-д тус тус тусгаарлан тандалт шинжилгээ хийн ажиллахаар болсон.

Үүнээс гадна Улаанбаатар-Стамбулын нислэгийг энэ сарын 18-ний өдрийн 06:30 цагт хийхээр бэлтгэл ажлыг ханган ажиллаж байгааг Засгийн газар мэдээлсэн. Онгоц Стамбул хотноо орон нутгийн цагаар 10.00 цагт бууж, Улаанбаатар хот руу орон нутгийн цагаар 11.40 цагт хөөрөх товтой байна. "COVID-19"-ийн халдвараас урьдчилан сэргийлэх хүрээнд гадаад улсад түр хугацаагаар зорчиж яваад нутаг буцах боломжгүй болсон иргэдийн өргөдөл, хүсэлтийг үндэслэн БНСУ, Япон улс болон Европын улсуудад байгаа хүндэтгэн үзэх шалтгаантай иргэдийг Сөүл, Токио, Москва, Берлин, Стамбул хотоор дамжуулан татан авах ажиллагаа үргэлжилж байна.

Б.Энхжин

Холбоо барих: enkhjin.b@bloombergtvmongolia.com

uyanga.m@bloombergtvmongolia.com