“Эрдэнэс Таван Толгой" компанийн нүүрсний давхаргын метан хийн туршилтын үйлдвэр ирэх тавдугаар сард ашиглалтад орох төлөвлөгөөтэй байна. Энэ хүрээнд тус компани БНСУ-ын Төрийн өмчит “Kogas" корпорацитай хамтарч уурхайн талбайдаа туршилтын үйлдвэр байгуулах 788 метр гүн өрөмдлөг хийгээд байгаа аж. Төслийг хөгжүүлэхэд “Elgen", “Kogas" компаниуд мөн хамтран ажиллаж байна. “Эрдэнэс Таван Толгой"-ийн уурхайн талбайгаас их хэмжээний метан хий илрээд байгаа учраас энэхүү төслийг хэрэгжүүлэх боломжтой болсон гэж тус компанийн төсөл, дэд бүтэц эрхэлсэн захирал мэдээлж байсан юм. "Норвест" компанийн хийсэн судалгаагаар нийт хийн нөөцийг 20 гаруй тэрбум метр куб гэж тогтоосон байдаг. Мөн чанарын үзүүлэлтээрээ ч 84.5 хувь буюу сайн чанартайд тооцогдож байна. “Kogas" компанийн мэдээлснээр илүү гүнд буюу 300 метрээс гүнд нөөц эрс нэмэгддэг аж. Харин туршилтын үйлдвэрийг ашиглалтад оруулснаар 450-480 метр гүнд байх нүүрсний хамгийн зузаан давхаргад олборлолт хийх юм байна. Олборлолтын явцад ус бага ашиглана гэдгийг төсөлд менежментийн үүрэгтэй оролцож байгаа “Elgen" компанийн зүгээс мэдээлж байна. Харин эцсийн бүтээгдэхүүн нь цэвэршүүлсэн метан хий байх ажээ. Тиймээс зах зээлд нийлүүлж эхэлснээр цаашид метанаар ажилладаг цахилгаан станц байгуулах, айл өрхийн хийн хэрэглээг хангах боломжтой юм байна. Метан хий нь 98 хувийн шаталттай байдгаас гадна тортоггүй, үнэргүй гэдгээрээ онцлог юм. Мөн илчлэг чанар нь нүүрснээс 2.5 дахин их байдаг. Тиймээс “Эрдэнэс Таван толгой" компани эхний ээлжинд гэр хорооллын нэг хороог сонгож, метан хийн ахуйн хэрэглээг турших сонирхолтой байгаагаа илэрхийлжээ. Гэхдээ үүнээс өмнө туршилтын үйлдвэрийг зургаан сарын хугацаанд ажиллуулах шаардлагатай байгаа юм байна.

М.Дэлгэрмаа

Холбоо барих: delgermaa.m@bloombergtvmongolia.com

minjma.g@bloombergtvmongolia.com