ҮХАА-н сайд Ш.Түвдэндорж тэргүүтэй албаныхан Москва хотод ажлын айлчлал хийж ОХУ-ын Хөдөө аж ахуйн сайд болон Мал эмнэлэг хорио цээрийн албаны дарга зэрэг холбогдох албаны хүмүүстэй уулзалт, яриа хийсэн байна. Уулзалтаар Монгол Улсаас ОХУ руу экспортолж байгаа мах, махан бүтээгдэхүүн болон хөдөө аж ахуйн уламжлалт зарим бүтээгдэхүүнд ОХУ-аас ногдуулж байгаа татварыг тэглэх асуудлыг хөнджээ. Энэ хүрээнд талууд тохиролцоонд хүрч 2014 онд багтан хамтарсан ажлын хэсэг байгуулахаар болсон гэж салбарын яамнаас мэдээллээ. Мөн экспортлох махны хувьд эрүүл, аюулгүй байдлын баталгааг хангасан тохиолдолд Монгол Улсын нийлүүлэх боломжит хэмжээгээр Оросын тал махны импортын зөвшөөрөл, квот олгоход бэлэн гэдгээ илэрхийлсэн байна. Үүнээс гадна Монгол Улс дотоодын мах бэлтгэлийн үйлдвэрүүдээ ангилал ахиулахаас гадна аттестатчилах ажлыг эхлүүлэх зорилгоор үйлдвэрүүдийн тодорхой мэдээллийг багтаасан албан хүсэлтийг ОХУ-ын Хөдөө аж ахуйн байгууллагад хүргүүлэхээр тохиролцжээ. Урьдчилсан байдлаар зургаан үйлдвэрийн экспортлох эрхийг сэргээх, хоёр үйлдвэрт шинээр зөвшөөрөл олгох асуудлаар Гаалийн холбооны улсуудтай зөвшилцөж эцсийн хариуг ирүүлэхээр болжээ. Түүнчлэн хөдөө аж ахуйн салбарын мэргэжилтнүүд, малын эмч, байцаагч зэрэг 100 хүнийг ОХУ-д сургахад анхаарч энэ ажлыг 2016 оноос хэрэгжүүлэхээ тохиролцжээ. Мөн Монголын талаас тавьсан техник, технологийн шинэчлэл, тусламж зэрэгт чиглэсэн хүсэлтүүдийг ОХУ-ын тал зарчмын хувьд дэмжиж байгаагаа илэрхийлсэн байна. Салбарын яамнаас мэдээлснээр ОХУ-д зөвхөн мах экспортлоод зогсохгүй Европ, Зүүн Хойд Азийн зах зээлд гарах үеийн дамжин өнгөрөх хорио цээрийн асуудлаар ОХУ-ын талтай цаашид хамтран ажиллахаар тогтжээ.

Б.Батманлай

Холбоо барих: Batmanlai.b@bloombergtvmongolia.com

Tsatsralt.b@bloombergtvmongolia.com