“Facebook”-ийн Гүйцэтгэх захирал Марк Закерберг АНУ-ын Төлөөлөгчдийн танхимын сонсголд оролцлоо. Энэ үеэр тэрбээр “Технологийн салбарт бодлогын зохицуулалт хийх зайлшгүй шаардлагатай" гэдгийг онцолжээ. Харин хууль тогтоогчид цахим мэдээллийн аюулгүй байдлыг хангах зорилгоор “Facebook” болон бусад нийгмийн сүлжээнүүдэд зохих хяналт, зохицуулалт хийх нь зөв гэж үзсэн байна. Хэдий тийм боловч чухам ямар төрлийн зохицуулалт хийгдэх нь одоогоор тодорхойгүй байгаа аж. Марк Закерберг “Facebook-ээр дамжиж байгаа контентуудыг хянахад хиймэл оюун ухааны дэвшилтэт технологи ашиглах хэрэгтэй” гэдгийг онцлоод “Олон улсын хэмжээнд хүмүүсийн амьдралд интернетийн үүрэг нөлөө нэмэгдэж байна. Тиймээс цаашид бодлогын зохицуулалт хийгдэх зайлшгүй шаардлагатай гэж бодож байна. Би зохицуулалт хийгдэх ёсгүй гэж хэлээгүй, харин ямар зохицуулалт хийх вэ гэдэг нь чухал” гэсэн байна.

Мөн тэрбээр “Нэг зүйлийг ойлгох хэрэгтэй. “Facebook”-ээр дамжиж байгаа контентуудыг бүгдийг нь хянахад хэчнээн ч ажилтантай байсан ч хангалтгүй. Харин дэвшилтэт хиймэл оюун ухааны арга хэрэгслүүдийг хөгжүүлж, ашиглах хэрэгтэй” гэжээ. Түүнчлэн “Cambridge Analytica”-д алдагдсан “Facebook” хэрэглэгчдийн мэдээлэлд өөрийнх нь мэдээлэл ч мөн багтсан гэдгийг Марк Закерберг сонсголын үеэр илэрхийлсэн байна.

Үүнээс өмнө “Facebook”-ийн Гүйцэтгэх захирал Марк Закерберг Сенатын сонсголд оролцсон юм. Сонсголын дараа үнэлгээ нь 100 тэрбум ам.доллараар буураад байсан “Facebook” компанийн хувьцааны ханш таван хувиар өсөж, хоёр долоо хоногийн дээд түвшиндээ хүрчээ.

Гэхдээ Европын орнууд “Facebook”-ийг хатуу шүүмжилсэн хэвээр байгааг ажиглагчид онцолж байна. Тухайлбал, ХБНГУ-ын Хууль зүйн сайд өөрийн “твиттер” хуудсандаа Марк Закербергийг "Хариуцлагаа өнөөг хүртэл бүрэн ухамсарлаагүй байжээ" гэж шүүмжилсэн бол тус улсын тагнуулын Ерөнхий газрын дарга Ханс-Георг Маасен “Facebook”-т итгэж мэдээллээ өгөхгүй гэж мэдэгджээ. Ханс-Георг Маасен “Надад “Facebook” хаяг байхгүй. Ёс журмын дагуу би зөвхөн өөрийн үнэхээр итгэдэг компаниуддаа л мэдээллээ дамжуулна. Би мэдээллээ “Facebook”-т даатгаж өгөхгүй. Үүнийгээ илэн далангүй хэлж чадна” гэжээ.

Харин АНУ-ын Төлөөлөгчдийн танхимын гишүүн Кэти Кастор сонсголын үеэр “Хэн нэгэн ямар нэг цахим хуудсаар зочиллоо гэхэд тухайн цахим хуудаст “Facebook”-ийн “like”, “share” хийх функцтэй байвал энэ мэдээлэл “Facebook”-т цугларч байгаа байх нь, тийм үү” гэж асуухад Марк Закерберг “Тийм ээ, эрхэм Конгрессын гишүүн ээ. Хэрэглэгчийн найзуудаас хэнд юу таалагдсаныг харуулахын тулд” гэж хариулжээ. Түүнчлэн Кэти Кастор “Facebook-гүй хүмүүсийн хувьд америкчууд үүнийг маш сайн мэдэж байгаа гэж бодохгүй байна. Та хүмүүс цахим орчинд юу хийж байгаа, хайлтын системээр юу хайж байгаа бүгдийг нь харж байна. Юу худалдан авч байгааг нь хүртэл" гэхэд Марк Закерберг “Конгрессын гишүүн ээ, хэрэв тэд мэдээллээ хуваалцах юм бол шүү дээ” гэсэн байна.

Н.Номин-Эрдэнэ

Холбоо барих: nominerdene.n@bloombergtvmongolia.com

minjma.g@bloombergtvmongolia.com