АНУ-ын Төрийн нарийн бичгийн дарга Майкл Помпео БНХАУ-д айлчилж, тус улсын Гадаад хэргийн сайд Ван Итэй уулзлаа. Уулзалтын үеэр талууд эсрэг байр суурьтай байгаагаа илэрхийлжээ. Ингэснээр дэлхийн хоёр том гүрний хоорондын харилцаа улам хурцдаж байгааг ажиглагчид онцолж байна. Уулзалтын үеэр БНХАУ-ын тал “АНУ-ыг худалдааны маргааныг даамжруулж, Тайванийн асуудлаас эхлээд улс орны дотоод асуудалд хөндлөнгөөс оролцсон” гэж буруутгажээ. Мөн “Энэ явдал хоёр улсын харилцаанд сэв суулгаж, итгэлцлийг нурааж байна” гэж мэдэгдсэн байна. БНХАУ-ын Гадаад хэргийн сайд Ван И “АНУ худалдааны маргааныг улам хурцатгаж, Тайванийн асуудалд манай улсын хууль ёсны эрх, ашиг сонирхлыг үл хүндэтгэсэн хэд хэдэн үйлдэл гаргасан. Түүнчлэн БНХАУ-ын дотоод болон гадаад бодлогод ямар ч үндэслэлгүйгээр халдаж байна. Энэ бүх явдал хоёр улсын харилцан итгэлцлийг эвдэж, БНХАУ болон АНУ-ын цаашдын харилцаанд сэв суулгана гэж бид үзэж байна. Энэ бүгд бүхэлдээ АНУ, БНХАУ-ын үндэсний ашиг сонирхлын эсрэг байна. АНУ-ыг алдаа гаргахаа зогсоохыг бид шаардаж байна. Эцсийн дүнд АНУ, БНХАУ хамтын ажиллагаагаа эргүүлэн сэргээнэ гэдэгт бид найдаж байна” гэж мэдэгджээ.

Харин АНУ-ын Төрийн нарийн бичгийн дарга Майкл Помпео “Таны хөндсөн асуудлын хувьд бид үндсэндээ эсрэг байр суурьтай байна. БНХАУ-ын авсан арга хэмжээ бидний сэтгэлийг их зовоож байна. Тиймээс АНУ, БНХАУ-ын харилцаа маш чухал учраас эдгээр асуудлыг нэг бүрчлэн хэлэлцмээр байна. Түүнчлэн БНАСАУ-д хийсэн айлчлал, Умардын удирдагч Ким Чен Унтай хийсэн уулзалтын талаар тантай ярилцахыг хүсэж байна. Үүнээс гадна Солонгосын хойгийг цөмийн зэвсэггүй болгох хамтын ажиллагаанд ахиц дэвшил гарсныг онцолмоор байна” гэсэн байна.

АНУ-ын Төрийн нарийн бичгийн дарга Майкл Помпео БНАСАУ-ын цөмийн хөтөлбөрийг зогсоох асуудалд дэмжлэг авах зорилгоор гурав хоногийн хугацаатай Азийн дөрвөн улсаар айлчилж, Төрийн тэргүүн нартай нь уулзсан юм. Японы Ерөнхий сайд Шинзо Абэ, БНСУ-ын Ерөнхийлөгч Мун Жэ Ин нар дээрх асуудалд хамтран ажиллахаа илэрхийлжээ. Харин худалдааны маргааны улмаас БНХАУ-аас дэмжлэг авахад сорилттой тулгарч байна.

С.Өлзийбуян

Холбоо барих: ulziibuyan.s@bloombergtvmongolia.com

minjma.g@bloombergtvmongolia.com