АНУ-ын Калифорни мужийн ногоон бүсэд гарсан ойн түймэр салхины нөлөөгөөр эрчимтэй тархаж, гал сөнөөгчид түймрийг тогтоон барьж дийлэхгүй байна. Энэ нь тус мужийн түүхэнд долоо дахь хамгийн том түймэр болоод байгаа юм."Rim Fire" гэж нэрлээд байгаа ойн түймэр наймдугаар сарын 17-ны өдөр гарч эхэлсэн бөгөөд түүнээс хойш өнөөдрийг хүртэл үргэлжилсээр, одоогийн байдлаар 770 километр квадрат буюу 72 мянга 633 га газрыг хамраад байна. Түймрийн улмаас хэд хэдэн автомашины зам, амралтын газар болон зарим нэгэн байгууламжийг хаагаад байгаа ажээ. Хэрвээ түймрийг зогсоож чадахгүй бол дэлхий дээрх хамгийн удаан жилийн түүхтэй, хамгийн ховор байдаг шилмүүст модны нэгэн төрөл болох сэквойян төгөл шатах магадлал өндөр байна. Одоогийн байдлаар Калифорни мужийн гал сөнөөгчид шатсан ойн үнсийг Сан Франциско хотын цэвэр усны нөөцийг бохирдуулахаас сэргийлэх арга хэмжээ аван ажиллаж байгаа бөгөөд галын 20 хувийг унтраагаад байна. Түүнчлэн АНУ-ын хамгийн их жуулчин очдог газруудын нэг болох байгалийн үзэсгэлэнт “Yosemite” цэцэрлэгт хүрээлэн рүү явдаг төв замыг хаан тус газрын ойролцоо 3700 орчим гал сөнөөгч ус нөөцлүүр, нисдэг тэрэг ашиглан өдөр шөнөгүй ажиллаж байгаа ажээ. Гал сөнөөгчдийн мэдээлж байгаагаар АНУ-д халуун, хуурай өдрүүд үргэлжилж байгаа нь ойн түймэр газар авахад нөлөөлж байгаа гэнэ.

Б.Цэнгэл

Холбоо барих: minjma.g@bloombergtvmongolia.com