УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаанаар Ирээдүйн тэтгэврийн нөөц сангийн тухай хуулийн төслийг хэлэлцэхийг дэмжлээ. Энэ хуулийн төсөл нь барилгын салбартай холбогдож байгаа гэдгээрээ онцлог юм. Тухайлбал орон сууцны санхүүжилтийн тогтолцоо 2013 оны зургадугаар сараас эхлэн амжилттай хэрэгжиж байна. Энэ хүрээнд Монголбанкны өмчлөлд орон сууцны ипотекийн зээлээр баталгаажсан 1.8 их наяд төгрөгийн үнэт цаас, орон сууцны ипотекийн зээлийг санхүүжүүлэх зориулалтаар Монголбанкнаас банкуудад олгосон 650 тэрбум төгрөгийн зээлийн шаардах эрх бий болжээ. Эдгээрийг болон хувийн хэвшлийн хуримтлалыг дэмждэг энэ механизм, тогтолцоог Ирээдүйн тэтгэврийн санд шилжүүлэн авах нь зүйтэй гэж үзэж байгаагаа салбарын сайд С.Эрдэнэ илтгэлдээ дурдсан юм. Мөн цаашид уг тогтолцоо урт хугацаандаа үр ашигтай ажиллах эрх зүйн орчин бүрдүүлэх нь зүйтэй гэдгийг онцолжээ. Эдгээр өөрчлөлтийг хийх суурь шалтгаануудыг дурдвал сүүлийн 10 жилд нийт хүн амын тоо 16.1 хувиар өссөн бол ахмад настны тоо 21.9 хувиар буюу илүү хурдацтай өсчээ. Дундаж наслалт нэмэгдсэнээр 10 даатгуулагчид ногдох тэтгэвэр авагчийн тооны харьцаа 2013 онд 4, 2030 он гэхэд 7, цаашид 9 тэтгэвэр авагч болж өсөхөөр байна. Монгол Улсын хувьд тэтгэврийн шинэчлэлийг эрчимжүүлэх, тэтгэврийн даатгалын шимтгэлийн нэрийн дансны тогтолцоог хагас болон бүрэн хуримтлалын тогтолцоонд шилжүүлэх ажлыг үе шаттай хэрэгжүүлэх, урт хугацааны хөрөнгө оруулалтын санг бий болгох шаардлага үүссэн юм. Гэхдээ улсын төсвөөс болон хувийн хэвшлийн зүгээс шинээр хөрөнгө гаргах, одоогийн шимтгэл, хураамжийг шууд нэмэгдүүлэх боломжгүй байна. Тиймээс эдгээр асуудлыг шийдэх зорилготой хуулийн төслийг шуурхай шийдэх хэрэгтэй гэдэг дээр гишүүд санал нэг байна. Хэдий тэтгэврийн асуудал яригдаж байгаа ч цаанаа төсөв, мөнгөний асуудлыг хэлэлцэн шийдэх учраас хуулийн төслийг зөвхөн Эдийн засгийн болон Төсвийн байнгын хороодоор давхар хэлэлцэх хэрэгтэй гэж үзжээ.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com