“Tesla” компанийн Гүйцэтгэх захирал Илон Маск хөрөнгийн хэмжээгээрээ дэлхийд гуравдугаарт эрэмбэлэгдэж эхэллээ. Өөрөөр хэлбэл түүний хөрөнгийн хэмжээ “Facebook”-ийг үүсгэн байгуулагч Maрк Закербергийнхээс давсан байна.

Наймдугаар сарын арилжааны сүүлийн өдөр “Apple” компани хувьцаагаа дөрөв, “Tesla” компани хувьцаагаа тав хуваасан юм. “COVID-19”-ийн сөрөг нөлөөг үл ажран эдгээр компаниудын хувьцааны ханш энэ онд харгалзан 76 болон 496 хувиар өссөн учир үнэт цаасны эргэлтийг сайжруулах зорилгоор аль аль нь хувьцаагаа хуваажээ.

Даваа гарагийн арилжаагаар “Tesla”-ийн хувьцааны ханш үргэлжлэн өсөж, Илон Маскийн хөрөнгийн хэмжээ 115.4 тэрбум ам.доллар хүрсэн байна. Өөрөөр хэлбэл Марк Закербергийн хөрөнгөөс таван тэрбум орчим ам.доллароор илүү гарсныг ”Bloomberg”-ийн тэрбумтнуудын Index тооцоолжээ.

Үүний зэрэгцээ даваа гарагт мөн “Amazon.com” компанийн Гүйцэтгэх захирал Жэфф Безосийн өмнөх эхнэр Маккензи Скот дэлхийн хамгийн чинээлэг эмэгтэй болсон байна.

О.Адьяасүрэн

Холбоо барих: adiyasuren.o@bloombergtvmongolia.com

minjma.g@bloombergtvmongolia.com