Бүс нутгийн тээврийн дэд бүтцийг хөгжүүлэх төслийн хүрээнд Төв аймгийн Батсүмбэр сум, нийслэлийн Сонгинохайрхан дүүргийн Туул тосгон чиглэлийн 29.3 км хатуу хучилттай замын нээлт аравдугаар сарын 3-ны өдөр буюу энэ бямба гарагт болно. Партизан-Батсүмбэр чиглэлийн энэхүү замын ажлыг ХБНГУ-ын Сэргээн босголт зээлийн банкны санхүүжилтээр хийж гүйцэтгэж “China Railway First Group” болон “Очир Ням” компанийн түншлэл ажиллажээ. Энэ ондоо багтаан Дорнод аймгийг нийслэлтэй хатуу хучилттай автозамаар холбох ёстой ч зүүн аймгуудын замын ажил удаашралтай байгааг Зам, тээврийн сайд мэдээлсэн байна. Одоогийн байдлаар Өндөрхаан-Мөнххаан-Баруун-Урт чиглэлийн 132.6 км хатуу хучилттай авто замыг “Арж капитал” компани, Өндөрхаан-Чойбалсан чиглэлийн 50 км хатуу хучилттай замыг “Чайна Жео инженеринг” компани, мөн чиглэлийн 143 км замыг “Насны зам”, “Хансуун”, “Өвөрзалаат”, “Бадрах ойл” компаниуд барьж байна. Гэхдээ Өндөрхаан-Чойбалсангийн замд техникийн шаардлагын дагуу дахин гурван см битумаар хучих, замын тэгш байдлыг засах ажлыг хийж гүйцэтгэх шаардлагатай болсон байна. Харин Хөлөнбуйр сумын Хэрлэн голын 290 метр урт төмөр бетон гүүрийн ажил 98 хувьтай явагдаж байгаа ажээ. Мөн Хэнтий аймгийн Баянмөнх сумын Хэрлэн голын 212.2 метр урт төмөр бетон гүүрийн барилгын ажлын явц 83 хувьтай байна. Үүнээс гадна Элсэн тасархай-Арвайхээр чиглэлийн 40 км замын хэсэгчилсэн барилгын ажил дуусч байгаа аж. Улсын төсвийн хөрөнгөөр засч байгаа энэ хэсгийн 99.8 хувь нь хөдөлгөөн нээхэд бэлэн болжээ. Автозамын салбарт 2015 онд нийт 293.6 тэрбум төгрөгийн 26 чиглэлийн замын ажил хийгдэхээр төлөвлөгдсөн бөгөөд нийт уртын 0.65 хувь нь он дамжин хэрэгжсэн төслүүд байгаа юм.

М.Дэлгэрмаа

Холбоо барих: delgermaa.m@bloombergtvmongolia.com

minjma.g@bloombergtvmongolia.com