Зэсийн үнэ дахин 9000 ам.доллар давж, бүх цаг үеийн дээд түвшинд хүрэхэд ойртлоо. Дэлхийн эдийн засаг сэргэж байгаа энэ үед эрэлт өсөж, нийлүүлэлт буурах төлөвтэй гэж хөрөнгө оруулагчид үзэж байна.

Зэсийн үнэ өнгөрсөн оны гуравдугаар сард доод түвшиндээ хүрснээс хойш хоёр дахин өссөн байна. Улс орнууд эдийн засгаа дэмжих нэмэлт төсөв баталж, сэргээгдэх эрчим хүч, цахилгаан автомашины хэрэглээг нэмэгдүүлэх бодлого хэрэгжүүлж байгаа нь зэсийн эрэлтийн төлөвт эергээр нөлөөлж байна. Зэсийн үнэ ойрын хугацаанд тонн нь 10 мянган ам.доллар хүрнэ гэж “Citigroup”-ийн шинжээчид тооцоолсон байна.

Мягмар гарагийн өглөөний байдлаар Лондоны Металлын биржид зэсийн фьючерс үнэ 2.1 хувиар өсөж, тонн нь 9097 ам.доллар болсон байна.

Б.Батцэцэг

Холбоо барих: battsetseg.b@bloombergtvmongolia.com

minjma.g@bloombergtvmongolia.com