Хүнсээр хүнийг эмчлэх тухай Японоос эхлэлтэй хоол зүйн салбарын шинэ урсгал Монголд нэвтрээд багагүй хугацаа өнгөрч байна. Сүүлийн жилүүдэд зохицуулах үйлчилгээтэй хүнсний бүтээгдэхүүний үйлдвэрлэл хүчээ авч эхлээд байгаа юм. Бие махбодын бодисын солилцоог дэмжин, эмчилгээний үйлчилгээ үзүүлдэг хүнсний бүтээгдэхүүн зохицуулах үйлчилгээтэй хүнсний төрөлд багтдаг аж. Засгийн газраас хэрэгжүүлсэн инновацийн төслийн хүрээнд зохицуулах үйлчилгээтэй хүнсний бүтээгдэхүүн үйлдвэрлэх хэд хэдэн үйлдвэр байгуулагджээ. Тухайлбал, ШУТИС-ийн Үйлдвэрлэлийн технологийн сургуулиас инновацийн төслийн хүрээнд өөрийн сургуулийн дэргэд “Зохицуулах үйлчилгээтэй талх, гурилан бүтээгдэхүүний туршилт, судалгаа, инноваци”-ийн үйлдвэр 2015 оноос үйл ажиллагаагаа эхэлсэн байна. Тус үйлдвэр буудайн бүхэл үрийн, хөх тарианы гурилын, олон төрлийн үр, хатаасан луувантай “Сувиллын” талх, жигнэлтийн боов, жигнэмэг, торт зэрэг зохицуулах үйлчилгээтэй бүтээгдэхүүнээ зах зээлд нийлүүлж байна. Судалгаагаар зохицуулах үйлчилгээтэй хүнсний 60 гаруй хувийг сүүн бүтээгдэхүүн эзэлдэг бол хоол, хүнсний зохистой хэрэглээний 40 гаруй хувийг үр тариа, будаанаас хангахаар байдаг.

Түүнчлэн "Монфүүдланд" ХХК 2014 оноос эхлэн овьёос, бүхэл үр зэрэг үр тариа, зөгийн бал, ааруул, жимс, жимсгэнээр хүний эрүүл мэндэд тустай, амт чанартай хүнсний бүтээгдэхүүн үйлдвэрлэж эхэлжээ. Монголд тариалсан овьёосыг ашиглан өглөөний хоол зэрэг зургаан төрлийн бүтээгдэхүүнийг "Мовьёос" нэрээр зах зээлд нийлүүлж байна. Түүнчлэн нэмэлтээр бусад жимс, жимсгэнэ болох нэрс, гадил зэргийг хадгалагч бодисгүйгээр өөрсдөө хатааж бэлдэн, нэмэлт бүтээгдэхүүн болгон ашигладаг байна. Тус компани энэ оноос овьёосоос гадна эрдэнэ шиш, хөх тариа зэргээр өглөөний хоол, жигнэмэг хийхээр үйлдвэрийн шинэ шугам нэвтрүүлэх төлөвлөгөөтэй байгаагаа онцолсон юм. "Монфүүдланд" ХХК хэрэглэгчдэдээ зориулж ямар нэгэн хадгалагч зэрэг химийн гаралтай бодисны орц найрлагагүй, 100 хувь байгалийн гаралтай, эрүүл мэндэд ач тустай бүтээгдэхүүнүүд үйлдвэрлэж байна.

Үүнээс гадна “Тэнгэрийн хишиг” компани зохицуулах үйлчилгээтэй, эмчилгээний “Амуу” брэндийн бүтээгдэхүүнийг зах зээлд гаргадаг бол “Талх чихэр” компани зохицуулах үйлчилгээтэй бүтээгдэхүүн үйлдвэрлэж байна.

Х.Чимэддулам

Холбоо барих: chimeddulam.kh@bloombergtvmongolia.com

minjma.g@bloombergtvmongolia.com