Ирэх 2019 оны дөрөвдүгээр сараас Улаанбаатар хотод түүхий нүүрс оруулахгүй байхаар шийдвэрлэж, бэлтгэл ажил эхэлсэн талаар Ерөнхий сайд У.Хүрэлсүх мэдэгдээд байна. Ингэснээр 540 мянган тонн боловсруулсан түлшийг нэг жилийн дотор бэлтгэх шаардлага бий болж байгаа аж. Айл, өрхийг боловсруулсан түлшээр хангаснаар нийслэлийн агаарын бохирдол 50 болон түүнээс дээш хувиар буурах боломжтой гэж Засгийн газар үзэж байгаа юм. Түүнчлэн БНСУ-аас авах 500 сая ам.долларын зээлийн ерөнхий хэлэлцээрийг үзэглээд байгаа бөгөөд энэхүү зээлийн хөрөнгийг нийслэлийн агаарын бохирдол, орчны асуудлыг шийдвэрлэхэд зарцуулах сонирхолтой байгаагаа Ерөнхий сайд илэрхийлсэн юм. Агаар, хөрсний бохирдол арилгах зорилготойгоор авч буй энэхүү 500 сая.ам долларын зарцуулалт, хэрэгжилтэд БНСУ хяналт тавьж ажиллана. Тиймээс БНСУ-аас томилогдох ажлын хэсэг ирэх гуравдугаар сард Монгол Улсад ирж зээлийн зарцуулалтын төслийн судалгааг хийх юм байна.

Үүнээс гадна Улаанбаатар хотын агаарын бохирдлыг бууруулах хүрээнд дахин төлөвлөлтийн ажлыг эхлүүлээд байна. 2013 онд эхлэл нь тавигдаж байсан гэр хорооллын дахин төлөвлөлтийн хүрээнд 5200 гаруй өрхийн орон сууц барьж ашиглалтад оруулжээ. Гэр хорооллын дэд бүтцийн газрын мэдээлснээр энэ онд дахин төлөвлөлтийн төслийн хүрээнд 2000 орчим өрхийг орон сууцанд оруулах төлөвлөгөөтэй байгаа аж.

Б.Цацралт

Холбоо барих: tsatsralt.b@bloombergtvmongolia.com

minjma.g@bloombergtvmongolia.com