Сангийн яамнаас төсвийн алдагдлыг санхүүжүүлэх зорилгоор Монгол Улсын Засгийн газрын үнэт цаасыг олон нийтэд санал болгож байна. Харин энэ лхагва гарагт эхний ээлжийн буюу нэг бүр нь 100 мянган төгрөгийн нэрлэсэн үнэтэй, гурван сарын хугацаатай, нийт 100 тэрбум төгрөгийн хямдруулалттай Засгийн газрын үнэт цаасны захиалга эхэлж байгааг мэдээллээ. Энэхүү захиалга нь хуанлийн зургаан хоног үргэлжлэх учраас Засгийн газрын үнэт цаас авах хүсэлтэй иргэд, аж ахуйн нэгжүүд брокер, дилерийн компанид хандан, үнэт цаасны төлбөрийг тушааснаар захиалга хийх боломжтой болох юм байна. Хүүгийн хувьд тухайн долоо хоногт Монголбанкинд арилжигдсан ижил хугацаатай Засгийн газрын үнэт цаасны жигнэсэн дундаж хүүгээр тогтооно. Хэрэв Монголбанкны тухайн долоо хоногийн арилжаа цуцлагдсан тохиолдолд ижил хугацаатай Засгийн газрын үнэт цаасыг өмнөх арилжааны жигнэсэн дундаж хүүгийн хэмжээгээр тогтоохоор болжээ. Хөрөнгө оруулагч бондын төлбөрийг арилжааны шимтгэлийн хамт үнэт цаасны төлбөр тооцоо төвлөрсөн хадгаламжийн төв дэх өөрийн нэрийн 12 оронтой дансыг зааж арилжааны банкаар дамжуулан хийж гүйцэтгэнэ. Лхагва гараг бүрийн 13.00 цагаас хүүгийн түвшинг холбогдох цахим хуудсуудад албан ёсоор мэдээлэх юм. Харин худалдан авах захиалга цаг хугацааны ахлах дарааллаар биелэх учраас захиалгаа аль болох эрт өгөх нь зүйтэйг холбогдох байгууллагаас сануулж байна. Харин урьдчилсан төлбөрт системээр явагдах учраас таны захиалга биелэхгүй бол мөнгийг үнэт цаасны төлбөр тооцооны төвлөрсөн хадгаламжийн төвөөр дамжуулан буцаан олгох ажээ.

О.Одгэрэл

Холбоо барих: odgerel.o@bloombergtvmongolia.com

minjma.g@bloombergtvmongolia.com