Эхний ээлжийн буюу нэг бүр нь 100 мянган төгрөгийн нэрлэсэн үнэтэй, гурван сарын хугацаатай, нийт 100 тэрбум төгрөгийн хямдруулалттай Засгийн газрын үнэт цаасны захиалга энэ сарын 29-нд эхэлнэ. Захиалга хуанлийн зургаа хоногийн хугацаанд үргэлжлэх учраас иргэд, ах ахуйн нэгжүүд брокер, дилерийн компанид хандан үнэт цаасны төлбөрийг тушааснаар захиалга хийх боломж бүрдэх аж. Хүүгийн хувьд тухайн долоо хоногт Монголбанкинд арилжигдсан ижил хугацаатай Засгийн газрын үнэт цаасны жигнэсэн дундаж хүүгээр тогтоох юм байна. Харин Монголбанкны тухайн долоо хоногийн арилжаа цуцлагдсан тохиолдолд ижил хугацаатай ЗГҮЦ-ны өмнөх арилжааны жигнэсэн дундаж хүүгийн хэмжээгээр тогтоохоор болжээ. Хөрөнгө оруулагч бондын төлбөрийг арилжааны шимтгэлийн хамт үнэт цаасны төлбөр тооцоо төвлөрсөн хадгаламжийн төв дэх өөрийн нэрийн 12 оронтой дансыг зааж арилжааны банкаар дамжуулан хийж гүйцэтгэнэ. Лхагва гариг бүрийн 13.00 цагаас хүүгийн түвшнийг холбогдох цахим хуудсуудад албан ёсоор мэдээлнэ. Худалдан авах захиалга нь цаг хугацааны дарааллаар биелэх учраас захиалгаа аль болох эрт өгөх нь зүйтэйг холбогдох байгууллагаас сануулж байна. Харин урьдчилсан төлбөрт системээр явагдах учраас захиалга биелэхгүй бол мөнгийг үнэт цаасны төлбөр тооцооны төвлөрсөн хадгаламжийн төвөөр дамжуулан буцаан олгох ажээ.

О.Одгэрэл

Холбоо барих: Odgerel.o@bloombergtvmongolia.com

Tsatsralt.b@bloombergtvmongolia.com