Монгол Улсын Засгийн газраас олон улсын зах зээлд гаргасан урт хугацаат бондуудын ханш зургадугаар сард тогтвортой байлаа. Харин өнгөрсөн тавдугаар сард бондуудын ханш сүүлийн хоёр жил гаруйн дээд цэгтээ хүрч байсан юм. Өөрөөр хэлбэл хөрөнгө оруулагчдын Монголыг чиглэх хандлага эргэн өөрчлөгдсөн болохыг илтгэж байв. Харин зургадугаар сард 10 жилийн хугацаатай бондын ханш дунджаар 91.1 ам.доллар байсан нь сүүлийн хоёр жилд байгаагүй өндөр үзүүлэлт болж байна. Мөн 2018 онд эргэн төлөгдөх бондын ханшийн дундаж 96.4 ам.доллар байгаа нь үүнтэй ижил үзүүлэлт болж байгаа юм. Зургадугаар сард бондуудын ханш харьцангуй тогтвортой байсныг сарын өөрчлөлтийн хэмжээ илтгэж байна. Тухайлбал таван жилийн хугацаатай бонд зургадугаар сарыг 96.5 ам.доллараас эхлүүлж, сарын эцэс хүртэл 0.1 хүрэхгүй хувиар өссөн бол 10 жилийн хугацаатай бондын ханш сарын дунд хүртэл бага зэрэг буурах хандлагатай байсан ч сүүлийн хоёр долоо хоногт эргэн өсчээ. Тавдугаар сард “Оюу Толгой” төслийн хөрөнгө оруулагчид далд уурхайн бүтээн байгуулалт, санхүүжилтын төлөвлөгөөг баталсан нь хөрөнгө оруулалтын орчинд голлох нөлөөг үзүүлжээ. Энэхүү эерэг хандлага зургадугаар сарын туршид бондын зах зээл дээр хадгалагдсан гэж харж болохоор байна. Үүнээс гадна Монгол Улсын Засгийн газар олон улсын зах зээлд нэг тэрбум хүртэлх ам.долларын үнэлгээ бүхий бонд арилжаалах шийдвэрээ танилцууллаа. Энэ хүрээнд өнгөрсөн долоо хоногт хөрөнгө оруулагчдад нэг тэрбум юанийн бонд арилжаалах санал хүргүүлж, гурван жилийн хугацаатай 161 сая ам.долларын хөрөнгийг БНХАУ-ын “Дим Сам” бондын зах зээлээс амжилттай босгоод байгаа юм.

Б.Батманлай

Холбоо барих: batmanlai.b@bloombergtvmongolia.com

minjma.g@bloombergtvmongolia.com