Монголын хэвлэлийн зах зээлд олон улсын стандартыг хангасан нэгэн шинэ гишүүн мэндэллээ. Өдөр тутмын чөлөөт хэвлэлийн тоог нэгээр нэмж байгаа “Засгийн газрын мэдээ" сонин эхний ээлжинд 8000 хувь хэвлэгдэн гарна гэж тус сонины эрхлэгч С.Батбаатар мэдээллээ. Хэдийгээр онлайн сэтгүүлзүй хэвлэмэл сэтгүүлзүйн гол өрсөлдөгч хэвээр байгаа ч уншигчдын боловсрол дээшилж, илүү чанартай, олон талын байр суурийг илэрхийлсэн мэдээллүүд дутмаг байгааг тэрбээр онцолж байна. Тиймээс “Засгийн газрын мэдээ" сонин барууны сэтгүүлзүйн хэв маягийг агуулсан байхаас гадна бүх салбарын нийтлэл, бичлэгийг дүн шинжилгээнд тулгуурлан мэдээлж байхаараа онцлог юм байна. Сонин ардчилсан, шударга ёс, хүний эрхийг дээдэлж, чөлөөт сэтгүүлзүйн хэм хэмжээг бүрэн сахисан олон ургальч үзлийг илэрхийлэх мэдээллийн индэр байхаа мөн илэрхийлэв. “Засгийн газрын мэдээ" сонин эхний ээлжинд хэвлэмэл сэтгүүлзүйн дундаж жишгээр сониноо түгээх боловч цаашид зорилтот зах зээлээ тэлэх төлөвлөгөөтэй байгаа юм. Редакцийн зүгээс Монголын хэвлэлүүдээс хамгийн анх ёсзүйн кодыг дагаж мөрдөж байгааг мөн онцлов. "Засгийн газрын мэдээ" сонин өнөөдрөөс эхлэн орон даяар түгээгдэж эхэллээ. Энэ оны I улирлын байдлаар Монгол Улсын хэмжээнд 506 хэвлэл, мэдээллийн хэрэгсэл тогтмол үйл ажиллагаа явуулж байсан нь өнгөрсөн оны мөн үеэс 2.4 хувиар буурчээ. Ялангуяа өдөр тутмын сонины тоо ийнхүү нэгээр нэмэгдэж байна. Хэвлэлийн хүрээлэнгийн судалгаанаас харахад цахим сэтгүүлзүйн тоо нэмэгдэж байгаа боловч Улаанбаатар хотын уншигчид өөрт шаардлагатай мэдээллийнхээ 10 хувийг сониноос авч байсан бол орон нутагт 11 хувьтай байжээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com