Засгийн газар: Гамшгаас хамгаалах бүх нийтийн бэлэн байдлын зэргийг 14 хоногоор сунгалаа
Засгийн газраас дотооддоо цар тахлын халдварыг хумих, халдвар авсан хүмүүсийн ойрын хавьтлуудын шинжилгээ, тандалтыг дуусгах, цаашид дам халдваруудыг тогтоох, тэднийг шинжилгээнд хамруулах ажлуудыг өргөн хүрээнд хийх шаардлагатай гэж үзсэн байна. Иймд коронавируст халдварын цар тахалтай тэмцэх хариу арга хэмжээг эрчимжүүлэх, эрсдэлээс урьдчилан сэргийлэх зорилгоор улсын хэмжээнд бүх нийтийн бэлэн байдлын зэрэгт шилжүүлсэн хугацааг 2020 оны XII сарын 01-ний өдрийн 06:00 цаг хүртэл сунгахаар боллоо.
Үүнтэй холбогдуулан салбар дундын үйл ажиллагааг уялдуулан зохицуулах, нэгдсэн удирдлага, зохион байгуулалт, зохицуулалтаар ханган ажиллах эрхийг Монгол Улсын Шадар сайд, Улсын Онцгой комиссын дарга Я.Содбаатарт олгосон. Мөн их, дээд сургуулийн оюутны дотуур байранд байгаа оюутны нарийвчилсан судалгааг дахин гаргаж, оюутныг хоол хүнс, ариутгал, эрүүл мэндийн бүтээгдэхүүнээр хангах зардлыг цэцэрлэгийн хоол, ЕБС-ийн үдийн цайны зардлын хэмнэлтээс зарцуулахыг БШУ-ны сайдад зөвшөөрсөн байна. Харин банкны зээл, түрээс, эдийн засгийн талаарх асуудлаар ажлын хэсэг байгуулж, холбогдох төлөвлөгөөг ирэх долоо хоногийн Лхагва гарагт Засгийн газрын хуралдаанаар танилцуулахаар болсон.
Одоогийн байдлаар улсын хэмжээнд коронавирусийн батлагдсан тохиолдол 428 байгааг Эрүүл мэндийн яам мэдээлсэн. Өнөөдөр өглөө 11:00 цагаас хойш улсын хэмжээнд хийсэн нийт шинжилгээнд коронавирус илрээгүй байна. Ингэснээр одоогийн байдлаар нийслэлд халдвар авсан тохиолдлын нэгдүгээр хавьтлын 909 хүний шинжилгээ бүгд сөрөг гараад байна. Тархалтын голомт болоод буй Нийслэл болон Сэлэнгэ аймагт тандалт судалгаа үргэлжилж байгааг ЭМЯ тодотгосон юм.
Засгийн газрын шийдвэрийг хүргэж байна
Б.Энхжин
Холбоо барих: enkhjin.b@bloombergtvmongolia.com
uyanga.m@bloombergtvmongolia.com