11 дүгээр сарын 15-20-нд Монгол Улсын Засгийн газар, Массачусетсийн технологийн институттэй хамтын ажиллагааны гэрээ байгуулахаар тохиролцоод байна. Засгийн газрыг төлөөлж гэрээ байгуулах эрхийг Боловсрол, соёл, шинжлэх ухааны сайд Л.Гантөмөрт Засгийн газрын хуралдаанаар олголоо. Монгол Улсын Төрийн бодлого, олон улсын хөгжлийн чиг хандлага, дээд боловсролын чанарын шинэчлэлийн хүрээнд салбарын яам АНУ-ын Массачусетсийн технологийн институт буюу “MIT”-д анхлан хандсан байна. Ингэснээр харилцан ойлголцлын санамж бичигт гарын үсэг зурж, хамтарсан сургалт судалгаа хийх, профессоруудтай сургалт, арга зүйн чиглэлээр хамтрах, зочин багшаар ажиллах талаар харилцан тохиролцжээ. 1861 онд байгуулагдсан Массачусетсийн технологийн институтэд Монгол Улсаас 15 оюутан суралцаж байгаа болон суралцаж төгссөн байдаг байна. Түүнчлэн Засгийн газрын энэ удаагийн хуралдаанаар мөн Боловсрол, соёл, шинжлэх ухаан, спортын салбарт Монгол Улсын Засгийн газар болон Итали, Румын, Франц улсын Засгийн газар хоорондын 2015-2018 оны хөтөлбөр болон хэлэлцээрийн төслүүдийг хэлэлцэж, гарын үсэг зурах бүрэн эрх олгох тухай Ерөнхий сайдын захирамж гаргахаар боллоо. Ингэснээр Итали улстай оюутан, багш, судлаачдын солилцоо хэрэгжүүлэх боломжтой болох бол Франц улсад хоёр орны Засгийн газар хоорондын хамтарсан тэтгэлэгийн хүрээнд 10 монгол оюутныг Францад сургах тохиролцоо хэрэгжих боломжтой талаар Засгийн газрын Хэвлэл мэдээлэл, олон нийттэй харилцах албанаас мэдээллээ. Франц Улсад 1996 оноос хойш 140 гаруй монгол оюутан боловсрол эзэмшсэн байдаг байна.

М.Дэлгэрмаа

Холбоо барих: delgermaa.m@bloombergtvmongolia.com

minjma.g@bloombergtvmongolia.com