2014 онд улсын төсвийн хөрөнгө оруулалтаар зам тээврийн салбарт нийт 144.6 тэрбум гаруй төгрөгийн төсөл, арга хэмжээ санхүүжүүлэх байснаас нийт 116.1 тэрбум төгрөгийн санхүүжилт хийсэн гэж салбарын яамнаас мэдээллээ. Үүнд гадны зээлдүүлэгчид болох Азийн Хөгжлийн Банк, Европын Сэргээн Босголт Хөгжлийн Банкны зээлийн хөрөнгөөр барьж байгаа төслүүд ч багтсан байна. Харин энэ онд зам тээврийн салбарт 16 дахин бага хэмжээний үнийн дүн бүхий ажлыг санхүүжүүлэхээр төлөвлөжээ. Үүнд шинэ гэхээсээ илүүтэй он дамжин хэрэгжиж байгаа ажлууд багтсан байна. Энэ нь Засгийн газрын ялангуяа Сангийн яамны төсвийн хөрөнгө оруулалтын тухай бодлогод нийцэж байгаа аж. Хамгийн урт хугацаанд хэрэгжиж байгаа төслөөр 2007 онд эхэлсэн “Бүс нутгийн авто зам хөгжүүлэх" төслийг нэрлэж болно. Зээлийн санхүүжилттэй энэхүү төслийн хүрээнд Сайншанд-Замын үүд чиглэлийн 62.2 км болон 131.2 км хатуу хучилттай автозамыг энэ онд барьж дуусгах ёстой юм. Мөн дотоодын хөрөнгөөр баригдаж байгаа автозамуудаас дийлэнх нь он дамжиж байна. Үүнд Завхан, Тосонцэнгэл, Зэрэг, Жаргалант сумын доторх хатуу хучилттэй зам багтаж байгаа аж. Мөн Элсэн тасархай- Арвайхээр чиглэлийн 40 км авто зам он дамжиж байна. Гүүрийн барилгын ажлын тухайд Хэрлэн, Тэс, Хүдэр, Идэрийн голуудын гүүрийг шинэчлэн төмөр бетон гүүр барихад энэ онд 10.6 тэрбумыг зарцуулахаар төлөвлөжээ. Харин иргэний нисэхийн салбарт улсын төсвөөр орон нутгийн нисэх буудлуудын зурвас, даланг сайжруулах ажлуудыг төлөвлөжээ. Одоогоор нийт орон нутгийн 22 нисэх буудал байгааг Засгийн газраас 24 болгож нэмэгдүүлэхээр зорьж байгаа юм.

М.Дэлгэрмаа

Холбоо барих: delgermaa.m@bloombergtvmongolia.com

minjma.g@bloombergtvmongolia.com