АНУ-ын Ерөнхийлөгчөөр сонгогдсон Жо Байден цар тахлын нөлөөгөөр хүндрэлд ороод байгаа эдийн засгаа дэмжих үүднээс 1.9 их наяд ам.долларын нэмэлт төсвийг батлуулахаар төлөвлөж байна.

Энэхүү санхүүжилтийн 400 тэрбум ам.доллар нь цар тахлын үеийн зохион байгуулалтын арга хэмжээнд, 440 тэрбум ам.доллар нь байгууллага, бизнесүүдийг дэмжихэд зарцуулагдана. Үлдсэн нэг их наяд гаруй ам.доллар нь шууд зарцуулалт байх ажээ. Цалингийн доод хэмжээг нэмэгдүүлэх гэхчлэн Ардчилсан намынхны хувьд тэргүүлэх зорилтууд болсон эдгээр асуудлууд дээр Бүгд Найрамдах намынхантай зөвшилцөх нь Жо Байдены хувьд сорилт болох юм.

Эдийн засгаа сэргээх илүү өргөн хүрээний төлөвлөгөөгөө ирэх сард танилцуулна гэж Жо Байден мэдэгдсэн юм. Цаг уурын өөрчлөлтийн эсрэг арга хэмжээ болон дэд бүтцэд зарцуулах төсөв буюу илүү урт хугацааны хөгжлийн зорилтуудад анхаарсан төлөвлөгөө юм байна.

Шинэ багц хөтөлбөрийн хүрээнд цалингийн доод хэмжээг хамгийн багадаа хоёр дахин өсгөж, цагийн 15 ам.доллар болгохыг уриаллаа. Үүнийг Сенатын санал хураалтаар шийдвэрлэх ажээ. Жо Байден өмнө нь цалингийн доод хэмжээг нэмэгдүүлэх асуудлыг хөндөж байв. Одоогийн байдлаар АНУ-д цалингийн доод хэмжээ нь цагийн 7.25 ам.доллар байгаа юм.

Ж.Зоригт

Холбоо барих: zorigt.j@bloombergtvmongolia.com

minjma.g@bloombergtvmongolia.com