““COVID-19”-ийн халдвар авсан, эндсэн хүний тоо хамгийн өндөр байгаа АНУ-ын нийгэм, эдийн засаг ирэх оны гуравдугаар сар гэхэд хэвийн горимд шилжсэн байна” гэж АНУ-ын Ерөнхийлөгч Жо Байден мэдэгдээд байна. Мөн тэрбээр "Энэ тавдугаар сард багтааж 18-аас дээш насныхныг бүгдийг нь вакцинжуулахад хүрэлцэхүйц вакцины хангамжтай болно" гэж онцолжээ.

Эм зүйн салбарт дэлхийд тэргүүлэгч “Merck & Co” компани “Johnson & Johnson”-ийн нэг тунтай вакцины үйлдвэрлэлд дэмжлэг үзүүлж ажиллахаар болсон байна. Вакцинжуулалтын явцыг эрчимжүүлэхэд салбарын өрсөлдөгчид хамтарч байгаа чухал үйл явдал болж байгаа юм. Аюулгүй байдлыг хангаж, сургуулиудыг эргэн нээхэд анхаарч байгаа гэдэг утгаараа Жо Байден мөн багш нарыг эн тэргүүнд вакцинжуулалтад хамруулахыг мужийн захиргааныханд уриалаад байна.

Харин Токио хотын захиргаа онц байдлын дэглэмийг хоёр долоо хоногоор сунгах хүсэлтээ Засгийн газартаа илгээхээр төлөвлөж буй талаар “Nikkei” мэдээллээ. Одоо хэрэгжиж буй онц байдлын дэглэм энэ долоо хоногийн эцсээр дуусгавар болох юм. Токио болон зэргэлдээх бүс нутгуудад “COVID-19”-ийн халдварын шинэ тохиолдол эргэн нэмэгдэж байна.

Японд вакцинжуулалт эхлээд хоёр долоо хонож байгаа юм. Одоогоор 34 мянган хүнийг вакцинжуулаад байгаа аж. Энэ нь “Их 7”-ийн бусад орнуудтай харьцуулахад бага дүн болж байна.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com