АНУ-ын Төрийн нарийн бичгийн дарга Жон Керри Ирактай холбоотой асуудлаар Ойрхи Дорнодод хүрэлцэн ирсэн байна. Тэрбээр Иракийн нийслэл Багдадад хэвлэлийн бага хуралд оролцож, Ирак дахь Суннитын босогчдод АНУ-ын талаас агаарын цохилт өгөх эсэхийг судалж байгаа гэж мэдэгджээ. Тодруулбал АНУ-ын тагнуулын албаныхан хүчээ авч байгаа босогчдыг намжаахаар шаардлагатай мэдээллийг цуглуулж байгаа юм байна. Гэхдээ энэхүү үйл ажиллагаанд гэм зэмгүй иргэд болон Засгийн газрын цэргүүд өртөхгүй байх тал дээр анхаарч байгаа гэж Жон Керри мэдэгджээ. Үүнээс гадна Жон Керри Иракт үүсээд байгаа нөхцөл байдал нь бүс нутаг төдийгүй АНУ болон барууны эрх ашигт ч сөрөг үр дагавартай байгааг онцолсон юм. АНУ-ын Төрийн нарийн бичгийн дарга Жон Керри “Бидний өмнө Иракийн хувь заяаг шийдэх туйлын чухал үе ирээд байна. Энэ нь Иракийн удирдагчдын хувьд шийдвэр гаргах, хойшлуулж болшгүй цаг үе юм. Ирак улс бодитой аюул заналд өртөж, энэ аюулыг Иракийн эрх баригчид маш түргэн шийдэх арга хэмжээ авах ёстой. Ирэх хэдэн долоо хоног, хэдэн өдөрт хийх сонголтоос Ирак улсын ирээдүй шууд хамаарна. Үүнээс гадна Иракийн эрх баригчид нэгдэж, нэгэн санаагаар Суннитын босогчдын эсрэг арга хэмжээ авч чадах эсэх нь мөн чухал байна. Энэ бүхэн дараа долоо хоногт ч бус, дараа сард ч бус яг одоо л шийдэгдэнэ” хэмээн мэдэгдлээ. Үүнээс гадна Иракийн үндсэн хуулийн дагуу тус улсын Ерөнхий сайд Нури аль-Малики долдугаар сарын нэгний дотор шинэ парламентаа хуралдуулах ёстой. Үүний дараа парламент 30 хоногийн дотор Ерөнхийлөгчөө сонгож, Ерөнхийлөгч нь дараагийн 15 хоногт багтааж шинэ Ерөнхий сайдаа сонгох ёстой болоод байгаа юм. Үүний зэрэгцээ даваа гарагт Иракийн Засгийн газраас Багдадын хойд хэсэгт орших Бэйжигийн газрын тос боловсруулах үйлдвэр шатаж буй дүрсийг олон нийтэд дэлгэжээ. Гэхдээ одоогийн байдлаар энэ бичлэгийг хуурамч эсэхийг тогтоогоогүй байгаа юм байна.

Н.Алтан 

Холбоо барих: altan.n@bloombergtvmongolia.com

minjma.g@bloombergtvmongolia.com