Оны эхний таван сард Монгол Улс 60.5 сая ам.долларын жонш экспортолсон нь өнгөрсөн оны мөн үеэс 20 хувиар бага байна. Харин биет хэмжээгээр жилийн өмнөхөөс 6.4 хувиар өсөж, 237 мянган тонн болсон талаар Гаалийн ерөнхий газрын урьдчилсан гүйцэтгэлд дурдлаа.

Одоогоор жоншийг Замын-Үүд, Хавирга, Бичигт, Сэлэнгийн боомтоор БНХАУ, ОХУ-ын зах зээлд экспортолж байна. ОХУ-д цар тахал эрчимжсэнээр худалдаанд бэрхшээл учирч магадгүй гэж болгоомжилж байгаа талаар “Баялаг жонш” компанийн Ерөнхий захирал онцолж байв.

Цар тахлаас өмнө БНСУ, Япон зэрэг гуравдагч зах зээлд жонш экспортлох боломжуудыг судалж байгаа гэсэн мэдээлэл байсан юм. Хэдий тийм цар тахлын нөхцөл байдал нь дэлхий даяарх худалдааны нийлүүлэлтийн сүлжээнд гол бэрхшээл болсоор байна.

Харин оны эхний таван сард Монгол Улс 3.5 сая тонн төмрийн хүдрийг 236.7 сая ам.доллароор экспортолсон байна. Өнгөрсөн оны мөн үетэй харьцуулахад биет хэмжээгээр ойролцоо байгаа бол мөнгөн дүнгээр экспортын орлого 13.3 хувиар нэмэгджээ.

Түүнчлэн олон улсын хэмжээнд төмрийн хүдрийн үнэ өсөж байна. Гол нийлүүлэгч Бразилд цар тахал эрчимжихтэй зэрэгцээд өнгөрсөн сард төмрийн хүдрийн үнэ 20 гаруй хувиар өсжээ. Харин төмрийн хүдрийн гол хэрэглэгч БНХАУ-ын гангийн үйлдвэрүүдийн эрэлт тогтвортой байгаа нь богино хугацаанд үнэ үргэлжлүүлэн өсөх шалтгаан болж байна.

Т.Элиса | @elisa_elisat

Холбоо барих: elisa.t@bloombergtvmongolia.com

minjma.g@bloombergtvmongolia.com