АНУ-ын Сангийн сайд Жейкоб Лью “БНХАУ-ын Засгийн газар юанийн ханшаа илүү чөлөөлөх хэрэгтэй” гэж мэдэгдлээ. Мөн БНХАУ-ын эрх баригчид үл хөдлөх хөрөнгийн зах зээлд тулгараад байгаа асуудлаа шийдвэрлэж чадна гэдэгт итгэж байгаагаа мөн дурдсан байна. Үүнээс гадна Жейкоб Лью БНХАУ-ын Засгийн газраас АНУ-ын компаниуд болон цахим аюулгүй байдлын талаар баримталж байгаа бодлогод санаа зовниж байгаагаа илэрхийлжээ. Тэрбээр ирэх долоо хоногт болох АНУ БНХАУ-ын стратеги болон эдийн засгийн уулзалтад оролцох юм байна. Энэ он гарсаар юанийн ханш ам.долларын эсрэг 2.4 хувь суларсан нь хятад иргэд болон АНУ-ын экспортлогчдод муугаар нөлөөлж байгаа гэж АНУ-ын Сангийн Сайд Жейкоб Лью үзэж байгаагаа илэрхийллээ. Өнгөрсөн онд талууд БНХАУ-ын зах зээлийг илүү нээлттэй, ил тод болгох тал дээр санал нэгдэж байжээ. Жейкоб Льюгийн хувьд БНХАУ-д айлчлах үедээ ОХУ-ын эсрэг авах хориг арга хэмжээний талаар мөн ярилцахаар болсон байна. Мөн тэрбээр барууны орнууд нэмэлт хориг арга хэмжээ авсан тохиолдолд ОХУ-ын эдийн засаг хямрах аюултай гэдгийг онцолжээ. 

Д.Хаш-эрдэнэ 

Холбоо барих: khasherdene.d@bloombergtvmongolia.com 

minjma.g@bloombergtvmongolia.com