Европын Холбооны орнуудад үүсээд байгаа ажилгүйдлийн асуудлаар улс орны тэргүүнүүд Милан хотод чууллаа. Тус чуулганд оролцсон Франц, Германы удирдлагууд санхүүгийн бодлогын талаар баримталж байгаа ялгаатай байдлаа хойш тавьж Европын ажилгүй залуучуудад зориулсан 8.1 тэрбум ам.долларын төсвийг яаралтай зарцуулах шаардлагатай байгаа гэдэгт санал нийлжээ. Европын Холбооны орнуудад ажилгүйдлийн түвшин өссөөр байгаа нь тус бүс нутгийн эдийн засагт ихээхэн дарамт учруулаад байгаа юм. Тодруулбал Европын Холбооны 28 улсад ажилгүйдлийн түвшин 11.5 хувьтай буюу 25 сая иргэн ажилгүй байгаа аж.Тэр дундаа 15-24 насны иргэдийн 23.3 хувь нь ажилгүй байгаа юм. Бүсийн ажилгүйдлийн түвшин нэмэгдэхэд дэлхийн эдийн засгийн хямрал болон Европын Холбооны өрийн хямрал нөлөөлжээ. Европын ажилгүйдлийн асуудлаар сүүлийн 18 сард гурав дахь удаагаа хуралдаж байгаа тус чуулганы үеэр Франц болон Итали улс ажилгүй байгаа залууст ажлын байр бий болгохоор 18 тэрбум ам.долларын нэмэлт санхүүжилтийн хүсэлт тавьсан ч Герман улсын зүгээс эсэргүүцсэн байна. Одоогоор ажилгүй залууст зориулсан Европын Холбооны төсөв зургаан тэрбум еврод хүрсэн. Гэхдээ үүнээс дөнгөж нэг хувийг нь зарцуулаад байгаа талаар Европын комиссын Ерөнхийлөгч Хосе Мануэль Барросо мэдэгджээ. Түүнчлэн Итали, Францын төрийн тэргүүнүүд төсвийн алдагдлаа дотоодын нийт бүтээгдэхүүний гурван хувьд барих нь хэтэрхий хатуу бодлого болж байгааг дурдаад зөөлрүүлэх шаардлагатайг онцолсон байна. Харин Германы зүгээс бодлогоо хэвээр үргэлжлүүлэхээ мэдэгджээ. Үүний зэрэгцээ Италийн иргэд Европын холбооны зүгээс баримталж байгаа эдийн засгийн бодлогыг эсэргүүцэж жагссан. Жагсагчид хөрөнгө оруулалтыг дэмжихийн тулд шинэчлэл хийхийг шаардсан байна.

Э.Эрдэнэтуяа

Холбоо барих: Erdenetuya.e@bloombergtvmongolia.com

Tsatsralt.b@bloombergtvmongolia.com