“Covid-19”-ийн эсрэг дархлаажуулалтын ажил 167 улсад үргэлжилж байна. Европын Холбооны ихэнх улс зургаадугаар сарын эцэс гэхэд хүн амынхаа дийлэнх хувийг дархлаажуулах хангалттай вакцины нөөцтэй болно гэж “Bloomberg”-ийн шинжээчид үзэж байна.

Герман, Франц, Итали, Испани, Нидерланд зэрэг улс нийт хүн амынхаа 55 болон түүнээс дээш хувийг бүрэн вакцинжуулахаар төлөвлөөд байгаа аж. Тухайлбал: Испани улс вакцинжуулалтаа эрчимжүүлж наймдугаар сарын эцэс гэхэд хүн амынхаа 70 хувийг дархлаажуулах зорилт тавиад байна гэж тус улсын Ерөнхий сайд мэдээлсэн байна. Испани улс хүн амынхаа 12.7 хувьд вакцины эхний тунг хийгээд байгаа бөгөөд 8.74 сая тун вакцин ашиглажээ.

Үүнээс гадна Их Британи вакцинжуулалтын хөтөлбөртөө “Moderna”-ийн вакциныг ашиглаж эхлэхээр болоод байна. Энэ нь вакцины хомсдол үүсэж, “AstraZeneca”-ийн вакциныг тариулсан хүмүүст цус бүлэгнэх шинж тэмдэг илэрсэн гэх асуудалтай байгаа энэ үед вакцинжуулалтын хөтөлбөрт нь томоохон түлхэц болохоор байна.

БНСУ-д мягмар гарагт халдварын 668 шинэ тохиолдол бүртгэгдлээ. Энэ нь нэгдүгээр сараас хойших хамгийн өндөр үзүүлэлт болжээ. Ингэснээр тус улсад “Covid-19”-ийн халдварын батлагдсан нийт тохиолдол 106 мянга 898 болж, 1756 хүн нас бараад байна.

Ц.Бадмаараг

Холбоо барих: badmaarag.ts@bloombergtvmongolia.com

minjma.g@bloombergtvmongolia.com