Европын Төв банк бодлогын хүүгээ шинжээчдийн тооцоолж байсанчлан 0.5 хувьд хүргэж бууруулах шийдвэр гаргалаа. Үүнээс гадна энэ удаагийн хурлаар 1.5 хувь байсан зээлийн маржиныг нэг хувь болгож бууруулсан бол хадгаламжийн хүүг өөрчлөлгүй тэг хувьд хэвээр үлдээжээ. Ийнхүү 10 сарын дараа Европын Төв банк бодлогын хүүгээ бууруулахад түүхэн дээд хэмжээндээ буюу 12.1 хувьд хүрсэн Евро бүсийн ажилгүйдлийн хэмжээ болон 1.2 хувь хүртэл буураад байгаа инфляцийн түвшин зэрэг нь голлох нөлөөг үзүүлсэн байна. Евро бүсийг бүхэлд нь харах юм бол бодлогын хүүг бууруулсан нь хөрөнгө оруулагчдын хувьд таатай мэдээ болж байна. Харин бүсийн хамгийн хүчирхэг эдийн засагтай Герман улсын хувьд бодлогын хүүг бууруулах бус нэмэгдүүлэх саналтай байсан юм. Учир нь бодлогын хүүг 0.5 хувьд хүргэснээр Германы банкууд дахь хадгаламжийн хэмжээг бууруулах эрсдэл дагуулаад байгаа аж. Харин бодлогын хүүгийн шийдвэрийн дараа хийсэн хэвлэлийн бага хурлын үеэр Европын Төв банкны ерөнхийлөгч Марио Драги “Эдийн засгийн өсөлт цаашид ч буурах хандлагатай байгаа. Европын Төв банк эдийн засаг хангалттай сайжрах хүртэл одоогийн бодлогоо үргэлжлүүлнэ” гэж мэдэгдсэн. 

Б.Дуламхорлоо 

Холбоо барих: dulamkhorloo.b@bloombergtvmongolia.com