Оны эхний 10 сард агаарын тээврээр зорчигчдын тоо давхардсан тоогоор 1.4 сая давж, өнгөрсөн оны мөн үеэс 14.6 хувиар өсөөд байна. Дотоодын агаарын тээврийн компаниудын орлого энэ хугацаанд 441.8 тэрбум төгрөг болж, 2018 оны мөн үеэс 16 хувиар өсжээ.

2019 онд дотоодын агаарын тээврийн компаниуд нислэгийн чиглэлээ нэмэх зорилгоор хэд хэдэн шинэ нисэх онгоц хүлээн авлаа. Тухайлбал: 2019 оны эхээр МИАТ компани “boeing 737 MAX 8” загварын хоёр нисэх онгоц хүлээн авсан юм. Хэдий тийм боловч гуравдугаар сард ижил загварын нисэх онгоц Этиопт осолдсон тохиолдол гарсан бөгөөд ослын шалтгааныг тогтоох явцад онгоцны удирдлагын системд доголдол гарсан нь тогтоогдож, дэлхий даяар дээрх загварын онгоцыг нислэгт ашиглахыг хориглосон юм.

Үүнээс өмнө МИАТ “Avalon” компаниар дамжуулан 12 жилийн түрээсийн нөхцөлөөр дээрх загварын онгоцноос дөрвийг худалдан авахаар гурван талт хэлцлийг “Boeing”-той байгуулсан байв. Энэхүү хөлгийг энэ оны сүүлээр ашиглалтад оруулах асуудал яригдаж байсан ч одоогоор тодорхойгүй байгаа ажээ.

Харин есдүгээр сард МИАТ компани “Boeing 787-9 Dreamliner” нисэх онгоцыг АНУ-ын “Air Lease Corporation” компаниас түрээслэх гэрээ байгуулсан юм. Улмаар 2021 оноос эхлэн үйл ажиллагаанд авч ашиглах хүлээлттэй байна. Энэхүү онгоц нь АНУ руу зогсолтгүй шууд нислэг үйлдэх чадалтай, хэрэв зөвшөөрлөө авбал 2021 оноос АНУ руу шууд нислэг үйлдэх боломжтой болох аж.

Харин "Аэро Монголиа" компани долоодугаар сард хоёр дахь “Embraer Erj-145” онгоцыг хүлээн авсан бөгөөд есдүгээр сараас эхлэн БНХАУ-ын Тяньжин хот руу тогтмол нислэг үйлдэж эхлээд байгаа юм. Түүнчлэн энэ жил Турк, Монгол Улсын хооронд удаан хугацаанд яригдсан агаарын харилцааны хэлэлцээрт нэмэлт өөрчлөлт оруулах асуудал шийдэгдлээ. Улмаар “Turkish Airlines” Истанбул, Улаанбаатарын хооронд албан ёсоор шууд нислэг хийж эхлээд байна.

Мөн 2019 онд үйл ажиллагаагаа сэргээсэн “Eznis Airways” компани Турк руу нислэг үйлдэх хүсэлтээ гаргаад байгаа аж. Түүнчлэн “Eznis Airways” Улаанбаатар-Хонгконгийн хооронд шууд нислэг үйлдэж эхлээд байна.

Агаарын тээврийн салбарт болсон бас нэгэн томоохон үйл явдал нь БНСУ-ын “Asiana Airlines” компани Улаанбаатар, Сөүл чиглэлд нислэг үйлдэж эхэлснээр энэ чиглэлд гуравдагч авиа компани орж ирсэн юм. Энэ чиглэлд өрсөлдөөн нэмэгдсэнээр онгоцны тийзийн үнэд нөлөөлөх боломжтой гэж таамаглаж байгаагаа “Korean Air” компанийн ТУЗ-ийн дарга Ки Хон Вү онцолж байв.

“Korean Air” компани аравдугаар сарын эцсээр МИАТ компанитай нислэгийн код хуваалцахаар санамж бичиг байгуулсан юм. Энэ хүрээнд зорчигчид МИАТ компанийн "ОМ" аяллын дугаартай тийзээр Сөүлээр дамжин өнгөрөхдөө дахин шалганаар нэвтрэхгүйгээр гуравдагч улс руу хялбар нэвтрэх боломжтой болоод байна.

“Korean Air” компанийн ТУЗ-ийн дарга Ки Хон Вү

Б.Төгсбилиг | @TugsbiligB

Холбоо барих: tugsbilig.b@bloombergtvmongolia.com

minjma.g@bloombergtvmongolia.com