11 дүгээр сарын 21-ний өдрийн 17.00 цагаас хойш 1305 хүний сорьцод шинжилгээ хийхэд 26 хүнээс “COVID-19” илэрч, батлагдсан нийт тохиолдол 608 болсныг Эрүүл мэндийн яам мэдээллээ.

Улаанбаатар хотын нийт тохиолдол 40 болж, хоёроор нэмэгдсэн байна. Тэдгээрийн ойрын хавьтал 801 хүнийг тусгаарлаад байгаа юм байна. Мөн дам буюу хоёр дахь хавьтал 7528 хүнийг тогтоож, шинжилгээнд хамруулж байгаагаа ХӨСҮТ мэдээллээ.

Сэлэнгэ аймагт шинээр 19 тохиолдол бүртгэгдэж, "COVID-19"-ийн халдварын нийт тохиолдол 77, Дорноговь аймагт шинээр нэг тохиолдол нэмэгдэж, нийт тохиолдол 17 болсон байна. Дархан-Уул аймагт дөрвөн тохиолдол нэмэгдэж, "коронавирус"-ийн халдварын нийт тохиолдол 20 боллоо.

Харин Орхон болон Говьсүмбэр аймагт нэмж тохиолдол илрээгүй байна. Одоогоор Орхон аймагт нийт 17 тохиолдол, Говьсүмбэр аймагт нэг тохиолдол баталгаажаад байгаа юм.

Монгол Улсад бүртгэгдсэн 608 тохиолдлоос 56 хувь нь буюу 337 нь эдгэрсэн бол 26 хүн ажиглалтад байна. Ажиглалт, тандалтын хугацаа нь дууссан 312 хүн байгаа бол долоон хүн нутаг буцжээ. ХӨСҮТ-д эмчлүүлж буй 264 өвчтөнөөс биеийн байдал нь хүнд гурав, хүндэвтэр 41, хөнгөн 220 хүн байгаа юм.

Түүнчлэн тархалтын байдлыг харвал 52 хувь нь шинж тэмдэггүй, 19 хувь нь уушги, зүрх судасны архаг өвчлөлтэй, 15.5 хувь нь эмнэлзүйн шинж тэмдэг илэрсэн байдалтай байгааг ХӨСҮТ мэдээлсэн юм.

Б.Төгсбилиг | @TugsbiligB

Холбоо барих: tugsbilig.b@bloombergtvmongolia.com

minjma.g@bloombergtvmongolia.com