Энэ оны  1 дүгээр сард дотоодод үйлдвэрлэсэн болон Хятад улсаас импортолсон зарим нэр төрлийн бүтээгдэхүүний үнэ өмнөх оны мөн үетэй харьцуулахад 65 хүртэлх хувиар өссөн байна. Дотоодод үйлдвэрлэсэн хөнгөн бетоны үнэ өмнөх сартай харьцуулахад тогтвортой байсан хэдий ч өнгөрсөн оны мөн үеэс 31 хувиар өсчээ. Харин улаан тоосгоны үнэ өнгөрсөн оны мөн үеэс 65 хувиар өссөн үзүүлэлттэй гарсан нь хамгийн өндөр өсөлт байв.

Түүнчлэн цаг уурын нөхцлөөс шалтгаалж Монголд барилгын үйл ажиллагаа улирлын шинжтэй байдаг төдийгүй үүнийг дагаад барилгын материалын үйлдвэрлэл ч улирлын шинжтэй байдаг. Энэ байдал нь эдийн засгийн талаасаа хүндрэл дагуулдаг болохыг мэргэжилтнүүд онцолдог юм.

Тэгвэл энэ асуудлыг шийдэхийн тулд Монголын зарим компани үйлдвэрлэлдээ шинэ технологи нэвтрүүлж эхэллээ. Тодруулбал "Айзава Монгол" компани нь Японы JIS стандартыг үйлдвэрлэлдээ нэвтрүүлсэн байна. Ингэснээр өвлийн улиралд ч бетон зуурмаг үйлдвэрлэх боломжтой болж байгаа юм.