"АНУ-ын таамаглашгүй байдал нь геополитикийн хувьд тулгамдсан асуудал" гэж Европын зөвлөлийн Ерөнхийлөгч Дональд Туск мэдэгдлээ. Тэрбээр Европын Холбоо-Балканы орнуудын чуулга уулзалтын үеэр "Улс төрд ийм төрлийн арга хэрэгслийг холбоотон орнуудын эсрэг ашиглах нь тохиромжгүй" гэж онцолсон байна. Европын Зөвлөлийн Ерөнхийлөгч Дональд Туск “Бидний эсрэг зогсож байгаа улс биш харин хамгийн ойр холбоотон улс маань таамаглашгүй байх нь геополитикийн хувьд тулгамдсан асуудал мөн гэж бодож байна. Энэ бол тоглоом биш. Учир нь энд бидний холбоотон улстайгаа харилцах харилцаатай холбоотой асуудал яригдаж байна. Дональд Трамп яагаад “Таамаглашгүй байдал нь улс төрд маш хэрэгтэй арга хэрэгсэл болж болно” гэж хэлж байгааг ойлгож байна. Гэхдээ энэ нь зөвхөн нэг тал биш орнуудтай харилцах харилцаанд л яригдах асуудал” гэж мэдэгдлээ.

Болгарын Софи хотноо болсон энэхүү чуулга уулзалтаар Европын эрх баригчид АНУ-ын гадаад бодлого, ялангуяа Ираны хэлэлцээрээс гарах, гадаад худалдааны татварын бодлогынх нь талаар голчлон хэлэлцсэн байна.

Уулзалтын үеэр Германы Канцлер Ангела Меркель Ирантай бизнес хийдэг компаниудад нөхөн төлбөр олгохоор болж магадгүй гэсэн байр суурь илэрхийлжээ. Европын Холбоо Ираны хэлэлцээрийг дэмжиж байгаа ч АНУ энэ хэлэлцээрээс гарахаа мэдэгдсэн нь Европын зарим бизнесүүдэд эрсдэл дагуулж байгаа аж. Ангела Меркель “АНУ Ираны хэлэлцээрээс гарах шийдвэр гаргасан ч Европын Холбооны улсууд энэ хэлэлцээрт үлдэх болно. Жижиг, дунд бизнес эрхлэгчдэд тодорхой хөнгөлөлт үзүүлэх талаар хэлэлцэх боломжтой. Энэ талаар судалж байгаа. Гэхдээ АНУ Ираны хэлэлцээрийг орхисноос болж хохирч байгаа компаниудад нөхөн төлбөр олгох асуудлаар бид буруу ойлголт төрүүлж болохгүй” хэмээн онцоллоо.

Түүнчлэн Европын комиссын Ерөнхийлөгч Жан Клод Юнкер "Европын Комисс АНУ-тай яриа хэлэлцээ хийж байгаа. Нөхцөл байдал нааштай эргэх талаар зөвшилцөлд хүрч байгаа” гэж мэдэгдлээ. Мөн тэрбээр "Европын Холбоо АНУ-ын ган, хөнгөн цагааны импортын татвараас чөлөөлөгдсөн нөхцөлд л Дональд Трампын засаг захиргаатай худалдааг либералчлах яриа хэлэлцээг эхлүүлнэ гэж онцолсон юм.

Н.Номин-Эрдэнэ

Холбоо барих: nominerdene.n@bloombergtvmongolia.com

minjma.g@bloombergtvmongolia.com