АНУ-ын Ерөнхийлөгчийн сонгуульд нэр дэвшигч Дональд Трампын намын нөхөдтэйгөө үүсгэсэн зөрчилдөөн улам ширүүссэн байна. АНУ-ын төлөөлөгчдийн танхимын спикер, Бүгд Найрамдах намын гишүүн Пол Райн Дональд Трампыг цаашид дэмжихгүй гэдгээ мэдэгджээ. Учир нь татвар нуун дарагдуулсан мөн эмэгтэйчүүдийг доромжилсон зэрэг дуулианы улмаас Дональд Трампыг дэмжигчдийн тоо буурч байгааг санал асуулгаар тогтоосон байна. Тиймээс Бүгд Найрамдах намын Пол Райн, Жон Маккейн тэргүүтэй албан тушаалтнууд "Дональд Трампыг дэмжиж цагаа үрэхийн оронд төлөөлөгчдийн танхимын олонхын байр сууриа хадгалахыг эрмэлзэж байгаагаа" мэдэгджээ. Харин Дональд Трампын зүгээс намын нөхөд нь огт дэмжлэг үзүүлэхгүй байгаад бухимдаж байгаагаа Twitter хуудсаараа дамжуулан мэдэгдсэн байна. Хэдий тийм боловч тэдний дэмжлэггүй ч сайн ажиллаж чадна гэдгээ Дональд Трамп илэрхийлсэн юм. Үүнээс гадна Бүгд Найрамдах намын Үндэсний хорооны дэмжлэг болон санхүүжилт байгаа цагт Дональд Трамп кампанит ажлаа асуудалгүй үргэлжлүүлэх боломжтой гэж шинжээчид үзжээ. Харин эсрэг намын хувьд нэр дэвшигч Хиллари Клинтоныг Ерөнхийлөгч Барак Обама төдийгүй Ал Гор тэргүүтэй нөлөө бүхий хүмүүс хүчтэй дэмжсээр байна.

Н.Алтан

Холбоо барих: altan.n@bloombergtvmongolia.com

minjma.g@bloombergtvmongolia.com