Улаанбаатар хотын хэмжээнд эхний ээлжинд 12 байршилд гэр хорооллын дахин төлөвлөлтийн төсөл хэрэгжиж байна. Тодруулбал иргэдийн дэмжлэгтэйгээр сонгогдсон аж ахуйн нэгж нь тухайн газар нутагт амьдарч буй иргэдтэй харилцан тохиролцсоны үндсэн дээр төсөл хэрэгжүүлж байгаа юм. Эдгээрээс дурдахад, Ханын материал орчмын 72 га талбайд төсөл хэрэгжүүлж буй “Хера холдинг” компани эхний ээлжинд 38.8 га газрыг барилгажуулахаар ажиллаж байна гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ. Харин Хайлаастын 72-р сургууль орчмын 15 га талбайн дахин төлөвлөлтийг “Асар Өргөө” болон “Буурал сутай” компаниуд хэрэгжүүлж буй бөгөөд эхний ээлжийн 30 айлын орон сууцыг ирэх оны дөрөвдүгээр улиралд ашиглалтад оруулахаар төлөвлөжээ. Үүнээс гадна Батлан хамгаалахын их сургууль орчмын 30.3 га талбайд “Баганат өргөө” харин 20.1 га талбайд “Гангар инвест” зэрэг компани төсөл хэрэгжүүлж байгаа юм. “Баганат өргөө” компанийн хувьд, эхний ээлжинд 320 айлын орон сууцыг ирэх оны дөрөвдүгээр улиралд хүлээлгэж өгөх бол “Гангар инвест” мөн ирэх оны дөрөвдүгээр улиралд 480 айлын орон сууцыг ашиглалтад оруулахаар тооцоолжээ.

Б.Цацралт

Холбоо барих: Tsatsralt.b@bloombergtvmongolia.com