Гоо сайхны бүтээгдэхүүний зах зээл хамгийн тогтвортой орлоготой хэдий ч хамгийн өндөр өрсөлдөөнтэй зах зээлд тооцогддог. Энэ онд дэлхийн хэмжээнд хамгийн өндөр үнэлгээтэй байгаа компаниудын жагсаалтыг "Garnier" тэргүүлсэн байна. Тус компанийн зах зээлийн үнэлгээ хоёр тэрбум 178 сая ам.долларт хүрсэн байна. Харин "Johnson & Johnson" хоёр тэрбум 89 сая, "L'Oréal" хоёр тэрбум 70 сая ам.долларын үнэлгээгээр удаалжээ. Жагсаалтаас харахад тансаг зэрэглэлийн бус энгийн, өдөр тутмын гоо сайхны бүтээгдэхүүн үйлдвэрлэгч томоохон компаниуд өндөр үнэлгээтэй байна. Сүүлийн 10 жилийн хугацаанд эдгээр компанийн хувьд хамгийн том зах зээл нь БНХАУ болоод байгаа юм. Үүнээс гадна эдийн засгийн удаашрал 2012 онд ажиглагдаж эхэлснээр үсний шампунь болон гоо сайхны будаг хэргэлэлийн борлуулалт 29.9 хувиар буурчээ. Эдийн засагчид үүнийг гэрийн эзэгтэй нар хэмнэх сэтгэлгээнд шилжсэнээр зах зээлд хөдөлгөөн гарсан гэж үзэж байгаа аж. 2011 оны байдлаар гоо сайхны "Топ-50" компанийн нийт үнэлгээ 117.5 тэрбум ам.доллар байсан бол энэ онд 106.1 тэрбумд хүрч буураад байна. Зах зээлийн энэхүү хөдөлгөөнийг "Уруул өнгөлөгчийн хөдөлгөөн" хэмээн нэрлэдэг. Өөрөөр хэлбэл эдийн засгийн хүндрэлтэй үед гэрийн эзэгтэй нар уруулын будгаа арай хямд үнэтэй уруул өнгөлөгчөөр сольдог гэх утгатай юм байна.

М.Дэлгэрмаа

Холбоо барих: Delgermaa.m@bloombergtvmongolia.com

Tsatsralt.b@bloombergtvmongolia.com