Гидро металлургийн хамгийн том үйлдвэр Эрдэнэт хотноо нээлтээ хийж байна. “Ачит Ихт" компанийн байгуулсан үйлдвэр нь 99.9 хувийн агууламжтай Лондонгийн Металлын биржийн A зэрэглэлийн цэвэр зэс үйлдвэрлэх юм. Тус үйлдвэр бүрэн хүчин чадлаараа жилд 10 мянган тонн зэс боловсруулах боломжтой байгаа нь "Эрдмин" үйлдвэрээс дөрөв дахин өндөр хүчин чадалтайд тооцогдож байгаа юм. Үйлдвэрийн бүтээн байгуулалт гурван жил орчим үргэлжилсний эцэст энэ оны долдугаар сараас туршилт нь эхэлжээ. Харин дээрх үйлдвэрийн бүтээн байгуулалтад нийт 59 сая ам.долларын хөрөнгө оруулалт шаардагдсан байна. Тус үйлдвэр “Эрдэнэт" үйлдвэрийн ашигладаггүй, бага агуулгатай буюу 0.32 хувийг агуулгатай хүдрээс боловсруулалт хийж катодын зэс гарган авч байгаа аж. Одоогоор Японы компани тус үйлдвэрээс бүтээгдэхүүн худалдан авах хүсэлт гаргасан гэх мэдээлэл байгаагаас гадна зэсийн экспорт нь эхэлжээ. Энэхүү үйлдвэрийн 34 хувийг “Эрдэнэт" үйлдвэр, 51 хувийг нь Ерөнхийлөгчийн тамгын газрын дарга П.Цагааны гэр бүл эзэмшдэг байна. Үйлдвэр ашиглалтад орсноор 200 гаруй хүнийг ажлын байраар хангаад байгаа ажээ.

Д.Хаш-эрдэнэ

Холбоо барих: khasherdene.d@bloombergtvmongolia.com

minjma.g@bloombergtvmongolia.com