Дорноговь аймгийн Алтанширээ сумын нутагт барих газрын тос боловсруулах үйлдвэрийн төмөр замыг барьж ашиглалтад орууллаа. Энэхүү төмөр зам нь дэлгэмэл хэмжээгээр тооцвол 27 км урттай, IV зэрэглэлийнх бөгөөд жилд үйлдвэрлэлийн хэрэгцээний 1.5 сая тонн ачаа тээвэрлэх хүчин чадалтай юм байна.

Мөн Сайншандаас үйлдвэрийн талбай хүрэх 17.5 км урт хүнд даацын авто замыг бариад байна. Үйлдвэрийн бүтээн байгуулалтын үед цахилгаан эрчим хүчээр хангах 110 кВт-ын цахилгаан дамжуулах агаарын шугамыг дэд станцын хамт байгуулаад байна. Газрын тос боловсруулах үйлдвэрийн дэд бүтцийн барилга угсралтын ажлыг Монголын тал 100 хувь хариуцан гүйцэтгээд байгаа юм. Нээлтийн ёслолд Энэтхэгийн Газрын тос, байгалийн хийн сайд Дармендра Прадан оролцлоо.

БНЭУ-ын Газрын тос, байгалийн хийн сайд Дармендра Прадан

Газрын тос боловсруулах үйлдвэр жилд 1.5 сая тонн түүхий тос боловсруулах хүчин чадалтай байх бөгөөд ашиглах түүхий эдийг Дорнод аймгийн Зүүнбаянгаас “Тосон уул 19” болон “Тамсаг 21” талбайгаас авахаар төлөвлөж байна. Алтанширээ сумаас 550-640 км-ийн зайд байрлах газрын тосны талбайгаас түүхий газрын тос боловсруулах үйлдвэр уруу хэрхэн тээвэрлэх талаар Монгол, Энэтхэгийн Засгийн газар хэлэлцэж байна. Төмөр зам, дамжуулах хоолой, авто зам гэсэн хувилбаруудаас Монголын тал боломжит шийдлээ Энэтхэгийн талд танилцуулжээ.

УУХҮ-ийн сайд Д.Сумъяабазар

УУХҮ-ийн сайд Д.Сумъяабазар

2024 онд ашиглалтад оруулна гэж төлөвлөж байгаа газрын тос боловсруулах үйлдвэрийг Энэтхэгийн “Экспорт импортын банк”-ны жилийн 1.75 хувийн хүүтэй нэг тэрбум 236 сая ам.долларын хөнгөлөлттэй зээлээр санхүүжүүлнэ. Зээлийн эхний багц нэг тэрбум ам.доллар батлагдаад байгаа бол нэмэлтээр авах 236 сая ам.долларын зээлийн хэлэлцээрийн төсөл батлагдахаар хүлээгдэж байна. Зээлийн үндсэн төлөлт төсөл хэрэгжиж эхэлснээс найман жилийн дараа 20 жилийн хугацаанд хийгдэх ажээ. Төслийн менежментийн зөвлөх үйлчилгээг Энэтхэгийн “Engineers India Limited” компани хийхээр тавдугаар сард "Монгол газрын тос боловсруулах үйлдвэр" ТӨХХК-тай гэрээ байгуулсан юм.

"Монгол газрын тос боловсруулах үйлдвэр" ТӨХХК-ийн Гүйцэтгэх захирал Д.Алтанцэцэг

Төсөл хэрэгжүүлэхэд шаардлагатай бараа ажил үйлчилгээг нийлүүлэхдээ Энэтхэгийн “Экспорт, импортын банк” 75:25 харьцааны стандартыг мөрддөг байна. Хэдий тийм боловч яриа хэлэлцээний дүнд энэ хувийг Энэтхэгийн тал 65, бусад тал 35 гэсэн харьцаагаар тогтоод байгааг "Монгол газрын тос боловсруулах үйлдвэр" ТӨХХК онцоллоо.

М.Золбоо| @Manlaizolboo

Холбоо барих: zolboo.m@bloombergtvmongolia.com

minjma.g@bloombergtvmongolia.com