Энэ оны хоёрдугаар сард Монгол Улсын гадаад худалдааны нөхцлийн индекс 1.432 болж өмнөх сараас 0.005 нэгжээр, өнгөрсөн оны мөн үеийнхээс 12.5 хувиар буурсан байна. Импортын нефтийн бүтээгдэхүүний үнэ өссөн болон экспортын түүхий эдийн үнэ буурсан нь гадаад худалдааны нөхцлийн индекс буурахад нөлөөлжээ. Харин өнгөрсөн нэгдүгээр сард гадаад худалдааны нөхцлийн индекс 1.437 нэгжтэй гарч байсан байна. Нефтийн бүтээгдэхүүний хилийн үнэ 2011 оны тавдугаар сараас эхлэн хурдацтай өсч, 2012 оны эхнээс буурах хандлагатай байсан ч ирэх наймдугаар сараас эхлэн дахин өсөх хандлагатай байгаа аж. Харин экспортын бүтээгдэхүүний үнийн тухайд эрдсийн бүтээгдэхүүний экспортын тал орчим хувийг дангаараа бүрдүүлдэг нүүрсний үнэ нэг тонн нь дунджаар 68.8 ам.долларт хүрч буурсан  байна.