ОХУ-ын Ерөнхийлөгч Владимир Путин "Барууны орнуудын хоригийн улмаас уламжлалт экспортын бүтээгдэхүүний үнэ унаж, эдийн засагт хүнд дарамт учирч байна" гэж мэдэгдлээ. Владимир Путин сонинд өгсөн ярилцлагадаа "Газрын тос, байгалийн хийн салбарын алдагдал өсч, эрсдэлтэй нөхцөл байдал үүссэн" гэдгийг онцолсон юм. Тэрбээр “Газрын тосны ханш өндөр байгаа тохиолдолд нэмэгдэл орлогоор төсвийн зардлаа нөхдөг. Харин манай газрын тос, байгалийн хийн орлого маш аюултай цэг рүү буучихаад байна. Эдийн засгийн хоригийн улмаас манай экспортын бүтээгдэхүүний үнэ буурч байна. Хэдий тийм боловч энэ бүх үзэгдэлд эерэг тал ч бий” гэж мэдэгдлээ. Даваа гарагт ОХУ-ын рублийн ам.доллартай харьцах ханш 1.5 хувиар суларч, 75.9 рүү бууснаар хаалтын ханш түүхэн доод түвшин рүү уналаа. Харин 5 жилийн хугацаатай Засгийн газрын бондын өгөөж 0.43 хувиар өсч, 10.3 хувьд хүрсэн нь өнгөрсөн наймдугаар сараас хойших хамгийн хурдацтай өсөлт болжээ. Эрчим хүчний бүтээгдэхүүний ханш уналт, худалдааны гол түнш БНХАУ-ын эдийн засгийн удаашрал болон барууны орнуудын хориг рублийн ханшийг хагас жилийн дотор 26 хувиар унахад хүргэсэн юм. “Sberbank”-ийн шинжээчид рублийн ханш сул байгаа тул ОХУ-ын Төв банк мөнгөний зөөлөн бодлого хэрэгжүүлэх хугацааг хойшлуулах шаардлагатай гэж үзжээ.

Б.Дашням

Холбоо барих: dashnyam.b@bloombergtvmongolia.com

minjma.g@bloombergtvmongolia.com