“Оюу Толгой”-н ил уурхайгаас бүтээгдэхүүн гаргаж, зах зээлд нийлүүлэх тов хойшлогдох тухай тус компанийн зүгээс мэдээлсэн байна. Учир нь 2-4 дүгээр сарын хооронд “Оюу Толгой”-н үйлдвэрийн үйл ажиллагаа түр зогссоноос төлөвлөж байсан хэмжээнийхээ зэсийн баяжмалыг үйлдвэрлэж чадаагүй аж. Одоогийн байдлаар “Оюу Толгой”-н баяжуулах үйлдвэр энэ оны нэгдүгээр сарын сүүлээс эхлэн нийт найман мянган тонн баяжмал үйлдвэрлээд байгаа ч олборолтын хэмжээг хангалтгүй гэж үзэж байгаагаа тус компанийн үйл ажиллагаа хариуцсан дэд захирал Жэк Сато хэлсэн байна. Өнөөдрийн байдлаар баяжуулах үйлдвэрийн үйл ажиллагааг эхлүүлэхэд зориулж ил уурхайгаас нийт 10.4 сая тонн хүдэр олборложээ. Харин далд уурхайн хувьд агааржуулалтын босоо амын толгойн барилга баригдаж дууссан ба ажилчид, машин тоног төхөөрөмж нэвтрэх зориулалттай нэгдүгээр ам, хүдэр гадагшлуулах хоёрдугаар амын бүтээн байгуулалтын ажил хийгдэж байгаа аж. “Оюу Толгой”-н гүний уурхайг 2037 он хүртэл хөгжүүлэх дөрвөн үе шаттай хөтөлбөрийн нэгдүгээрт 2016 он гэхэд бүтээн байгуулалтын ажлыг дуусгахаар болсон байна. Харин хөтөлбөрийн хоёрдугаар шатанд 2016-2018 оны хооронд гаргасан бүтээгдэхүүнээ жигдрүүлэхээр төлөвлөжээ. Гуравдугаар үе шат 2018-2022 оны хооронд үргэлжлэх бөгөөд энэ хугацаанд үйл ажиллагаагаа өргөжүүлэхээр болсон байна. 

Үүнээс гадна 2022-2037 оны хооронд “Оюу Толгой”-н уурхайн хоёр болон гуравдугаар босоо амаар дамжуулж хоногт 90 мянган тонн хүдэр олборлох боломжтой болно гэж далд уурхайн ерөнхий инженер хэлсэн байна. Өнөөдрийн байдлаар гүний уурхайд 20-30 хүний багтаамжтай зургаан хоргодох байр байгуулсан бөгөөд 1300 метрийн гүнд нийт 112 хүн ажиллах боломжтой байгаа аж. Харин гүний уурхайн үйл ажиллагаа жигдрэх үед 500-600 хүн ажиллах шаардлага гарна гэж тооцоолсноос гадна 2037 он гэхэд уурхайн нийт урт 198 км-т хүрэх юм байна.