"Бодь даатгал" компанийн үнэт заасны анхдагч зах зээлийн арилжааны захиалга авах ажиллагаа өнөөдөр буюу энэ даваа гарагт дуусгавар болж байгаа бөгөөд андеррайтераар ажиллаж буй "Би Ди Сек ҮЦК" ХК дээр 17.00 цаг хүртэл захиалга авахаар хуваарилжээ.

Даваа гарагийн 14.00 цагийн байдлаар захиалгын хувь 85.5 хувь байсныг "Би Ди Сек ҮЦК" мэдээллээ. Тус компани стратегийн хөрөнгө оруулагчдад тогтоосон үнийн аргаар буюу нэгжийн үнийг 113 төгрөгөөр, олон нийтэд захиалгын үнийг 113-135 төгрөгийн хооронд санал болгон худалдаж, нийт 5.3-5.6 тэрбум төгрөг татан төвлөрүүлэхээр төлөвлөсөн байна. Үүнийг хөрөнгө оруулалт, инновац, технологийн хөгжүүлэлт, сайжруулалтад зарцуулахаар төлөвлөжээ.

Шинэ долоо хоногийн арилжааны эхний өдөр Монголын Хөрөнгийн биржид нийт 35.7 сая төгрөгийн арилжаа хийгдлээ. Энэ нь өнгөрсөн долоо хоногийн нийт арилжааны 38 хувьтай дүйцэж байгаа юм.

Монголын Хөрөнгийн биржийн I ангилалд бүртгэлтэй компаниудаас 10 компанийн хувьцаанд 25.6 сая төгрөгийн арилжаа хийгдсэн нь даваа гарагийн арилжааны дийлэнхийг бүрдүүлсэн юм. Ялангуяа "АПУ" ХК (7.67 сая төгрөг), "Говь" ХК (4.86 сая төгрөг), "Мандал даатгал" ХК (4.29 сая төгрөг), "Лэндмн ББСБ" ХК (3.68 сая төгрөг) арилжааны идэвхээр тэргүүлжээ. Даваа гарагт "Баянгол зочид буудал" ХК-ийн нэгж хувьцааны ханш 10.18 хувиар буурсан нь биржийн I ангилалд уналтын хувь хэмжээгээр тэргүүлсэн үзүүлэлт боллоо. Харин "Лэндмн ББСБ" ХК-ийн хувьцааны ханш өнөөдрийн арилжаагаар 2.19 хувиар өссөн байна.

Өнгөрсөн ням гарагт "Улсын их дэлгүүр" ХК-д үүссэн онцгой нөхцөл байдлын дараа даваа гарагийн арилжаагаар тус компанийн хувьцааны ханш даруй 12.89 хувь суларч, нэгж хувьцааны ханш 531.4 төгрөг болсон байна. Ингэснээр хувьцааны ханшаар илэрхийлэгдэх зах зээлийн үнэлгээ нь 19 тэрбум 559.7 сая төгрөг боллоо. МХБ уг үүссэн нөхцөл байдалд харамсаж буйгаа илэрхийлээд "Үнэт цаас гаргагчийн мэдээллийн ил тод байдлын журам", МХБ-ийн Бүртгэлийн гэрээнд заасны дагуу хувьцааны үнэ ханшид нөлөөлөхүйц аливаа онцгой нөхцөл байдлын үйл явц, хохирлын хэмжээ, цаашид авч хэрэгжүүлэх арга хэмжээний талаар хувьцаа эзэмшигчдэд тухай бүрд нь шуурхай мэдээлэх үүрэгтэйг санууллаа.

Монголын Хөрөнгийн биржийн II ангилалд бүртгэлтэй 13 компанийн 92 мянга гаруй хувьцаанд 9.83 сая төгрөгийн арилжаа хийгдсэн бол III ангилалд бүртгэлтэй долоон компанийн 1246 ширхэг хувьцаанд 247 мянга 460 төгрөгийн арилжаа хийгдсэн байна.

Г.Ану | @AnuHarchu

Холбоо барих: anu.g@bloombergtvmongolia.com

minjma.g@bloombergtvmongolia.com