БНХАУ-ын Таншань хотын Цао Фей Диан боомтоос Улаанбаатар хот орох анхны чингэлгийн галт тэрэг даваа гарагт хөдөлсөн талаар БНХАУ-ын “Синьхуа” агентлаг мэдээллээ. Цахилгаан тоног төхөөрөмж, тавилга болон барилгын материал ачсан энэхүү галт тэрэг Эрээн хотоор дамжин Улаанбаатарт хүрнэ гэж мэдээлж байна. Мөн шинэ маршрутаар явах галт тэрэг ган бүтээгдэхүүн болон барилгын материалыг Монгол болон Европын улсууд руу экспортлох боломжтой гэж Цао Фей Диан боомтын захиргаа үзэж байна. Мөн боомтын захиргаа Өвөр Монголын Өөртөө Засах орны Улаан-Цав хоттой байгуулсан гэрээний дагуу Монгол Улс, ОХУ, БНХАУ-ын эдийн засгийн коридорын дамжин өнгөрөх тээвэрт оролцох боломжтой аж. Цао Фей Диан нь Бээжингээс зүүн зүгт 200 км-ийн зайд оршдог БНХАУ-ын эдийн засгийн хөгжлийн бүс юм.

Э.Төгөлдөр

Холбоо барих: tuguldur.e@bloombergtvmongolia.com

minjma.g@bloombergtvmongolia.com