БНХАУ нүүрсний томоохон таван цахилгаан станцаа нэгтгэх замаар хүчин чадлыг нь бууруулж, өрийн дарамттай салбараа дэмжихээр зорьж байна.

Гурван жил үргэлжлэх энэхүү туршилтын хөтөлбөрийн хүрээнд цахилгаан станцуудын хүчин чадлын гуравны нэг хүртэлх хувийг нь бууруулахаар төлөвлөсөн талаар эх сурвалж мэдээллээ. Тухайлбал: БНХАУ-ын баруун хойд бүсийн Гансу мужийн “Huaneng Group”, Шанси мужийн “Datang”, Шиньжяны “Huadian” зэрэг компани багтжээ.

Дашрамд дурдахад, Нарийнсухайтын бүлэг ордод олборлолт хийж буй компаниуд Гансу мужийн гангийн үйлдвэрт, харин Хөшөөтийн ордод олборлолт хийж байгаа “Mongolia Energy Corporation” Шиньжян руу нүүрсээ нийлүүлж байгаа аж. Туршилтын хөтөлбөрт хамрагдаж байгаа нүүрсний таван цахилгаан станцын нийт хүчин чадлын хэмжээ өнгөрсөн оны эцэс гэхэд 520 гигаватт хүрсэн байна. Харин өрийн хэмжээ нь 1.1 их наяд юань буюу 156 тэрбум ам.доллар болжээ.

БНХАУ-ын нүүрсний цахилгаан станцууд 30 мужид эрчим хүч хуваарилдгаас зөвхөн өнгөрсөн онд л гэхэд 15-д нь алдагдал хүлээсэн байна. Дэлхийн нийт нүүрсний нийлүүлэлтийн тал орчим хувийг БНХАУ олборлож, хэрэглэдэг. Ингэснээр дотоодынхоо эрчим хүчний хэрэгцээний 60 хувийг хангаж байгаа аж. Хэдий тийм боловч нар, салхины эрчим хүчний салбарт хамгийн их хөрөнгө оруулсаар байгаа юм.

М.Золбоо| @Manlaizolboo

Холбоо барих: zolboo.m@bloombergtvmongolia.com

minjma.g@bloombergtvmongolia.com