Азийн орнуудад вакцинжуулалт харьцангуй эрчимжиж байна. Тухайлбал: БНСУ энэ баасан гарагаас “COVID-19”-ийн эсрэг вакцинжуулалтаа эхэлж байна. БНСУ эхний ээлжид 65 хүртэлх насны эрүүл мэндийн салбарын ажилтнуудад “AstraZeneca”-ийн вакцин хийнэ.

Тус улсын хэмжээнд одоогийн халдвар хамгааллын дэглэмээ дахин хоёр долоо хоног үргэлжлүүлэхээр шийдвэрлэсэн байна. Тав ба түүнээс дээш тооны хүн нэг дор цугларахыг хориглосон хэвээр байх ажээ.

Европын Холбооны удирдагч нар аялал, жуулчлалыг сэргээх зорилгоор тивийн хэмжээнд вакцин хийлгэсэн хүмүүст үнэмлэх олгож эхлэх саналыг дэмжлээ. Гэхдээ үнэмлэх авсан хүн ямар эрх эдлэх дээр тохиролцоогүй байна. Европын орнуудад “COVID-19”-ийн халдвараар 800 мянга гаруй хүн нас бараад байгаа юм.

АНУ-ын Ерөнхийлөгч Жо Байден ажил үүргээ хүлээн авснаас хойш тус улсын хэмжээнд вакцинжуулалтад 50 сая тун вакцин ашиглаад байна. “Johnson & Johnson”-ийн вакциныг Хүнс, эмийн удирдах газар бүртгэж зөвшөөрөл олговол тус компанийн үйлдвэрлэх хэмжээгээр вакцинжуулалтаа эрчимжүүлнэ гэж тэрбээр онцолсон байна.

Түүнчлэн хүн амынх нь 50 гаруй хувь нь вакцины эхний тунг хийлгэсэн Израил улс эдийн засгаа алгуур нээж эхэлжээ.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com