ОХУ-д шинэ төрлийн “коронавирус”-ийн халдварын тохиолдол 8.7 мянгаар нэмэгдэж, хагас сая давлаа. Азиас Энэтхэгт 11.1 мянгаар нэмэгдэж, 300 мянга дөхсөн байна.

Түүнчлэн Сөүлд халдварын тохиолдол 45-аар буюу огцом нэмэгджээ. Үүний дараа БНСУ-ын Эрүүл мэндийн яам тархалтын хоёр дахь давлагаа эхэлж болзошгүй байгааг анхааруулжээ.

Бразилд шинэ төрлийн “коронавирус”-ийн халдварын батлагдсан тохиолдол 27.6 мянгаар нэмэгдэж, тархалтын хурдаар тэргүүлсэн хэвээр байна. Тус улсад дэлгүүр, худалдааны төвүүд эргэн нээгдэж эхлээд байгаа юм.

АНУ-д халдварын тохиолдол 1.1 хувиар нэмэгдлээ. Техас мужид тархалт огцом нэмэгджээ. Тус улсын дөрөв дэх том хот болох Хьюстонд дахин хөл хорио тогтоож магадгүй байна. Нью-Йорк хотод 100 мянган хүн ажилдаа эргэн ороод байна. Мөн жижиглэн худалдаа болон барилга, аж үйлдвэрийн салбарыг энэ долоо хоногоос нээж эхэлжээ. Нью-Жерси муж эдийн засгаа эргэн нээх дөрвөн үе шаттай төлөвлөгөөнийхөө хоёр дахь шатыг энэ сарын 15-наас эхлүүлэх юм.

Австралид амралтын өдрүүдэд жагсаал цуглаан хийхийг шүүх хориглолоо. Цар тахлын эсрэг арга хэмжээнд олон нийтийн арга хэмжээнүүд сөргөөр нөлөөлж болзошгүй гэсэн болгоомжлол нэмэгдээд байгаа юм.

Цар тахлын тархалт Африкт огцом нэмэгдэж байгааг Дэлхийн Эрүүл Мэндийн Байгууллага анхаарууллаа. Гурван сар гаруй хугацаанд 100 мянга хүрээд байсан “COVID-19”-ийн халдварын тохиолдол гурван долоо хоног хүрэхгүй хугацаанд хоёр дахин нэмэгджээ.

АНУ-ын биотехнологийн “Regeneron Pharmaceuticals” компани шинэ төрлийн “коронавирус”-ийн эсрэгбиеийн эмчилгээний хүн дээрх туршилтыг эхлүүлээд байна. Түүнчлэн “Moderna” вакцины туршилтаа 30 мянган хүнд хийхээр төлөвлөжээ. Клиникийн гурав болон сүүлийн шатны туршилт ирэх сараас эхлэх юм байна.

Дэлхийн хэмжээнд шинэ төрлийн “коронавирус”-ийн халдварын 7.5 сая, эндсэн 423 мянган тохиолдол бүртгэгдээд байна. Харин эдгэрсэн хүний тоо 3.8 сая давжээ.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com