АНУ болон БНХАУ-ын ухаалаг гар утасны эрэлт, борлуулалт өндөр байснаас БНСУ-ын тавдугаар сарын экспорт шинжээчдийн таамаглаж байснаас илүү өсөлттэй гарсан байна. Тус улсын холбогдох яамны мэдээлснээр, БНСУ-ын экспорт дөрөвдүгээр сард өнгөрсөн оны мөн үетэй харьцуулахад 0.4 хувиар өссөн байсан бол тавдугаар сард 3.2 хувиар өссөн үзүүлэлттэй гарлаа. Эдийн засагчид тус улсын тавдугаар сарын экспорт дунджаар 0.9 хувийн уналттай гарна гэж тооцоолж байжээ. БНСУ-ын утасгүй харилцаа холбооны төхөөрөмжийн хилийн чанад дахь борлуулалт тавдугаар сард өнгөрсөн жилийнхтэй харьцуулахад 62.5 хувиар өссөн байна. Үүнээс АНУ руу хийх эскпорт 21.6 хувиар, БНХАУ руу хийх экспорт 16.6 хувиар өссөн бол Япон дахь борлуулалт 11.7 хувиар буурсан байна. Харин БНСУ-ын тавдугаар сарын импорт 4.8 хувиар буурчээ. Түүнчлэн худалдааны тэнцэл нь зургаан тэрбум ам.долларын ашигтай гарсан нь 2010 оны аравдугаар сараас хойшхи хамгийн дээд хэмжээ болсон байна. 

Г. Ану 

Холбоо барих: anu.g@bloombergtvmongolia.com 

minjma.g@bloombergtvmongolia.com