БНСУ-ын импортын бараа бүтээгдэхүүний үнэ сүүлийн дөрвөн сарын хугацааны хамгийн огцом бууралтыг үзүүлсэн байна. Энэ нь вонын ханш ам.долларын эсрэг чангарсантай холбоотой гэж тус улсын Төв банкнаас мэдээллээ. Тус улсын импортын бараа бүтээгдэхүүний үнэ есдүгээр сард өнгөрсөн жилийн мөн үеэс 8.1 хувиар буурсан байгаа нь бууралтын хурд нэмэгдсэнийг илтгэж байна. Ингэснээр импортын бараа бүтээгдэхүүний үнэ 13 дахь сардаа дараалан буурсан үзүүлэлттэй гарлаа. Есдүгээр сарын эцсийн байдлаар вон ам.долларын эсрэг өнгөрсөн жилийн мөн үеэс 3.44 хувиар чангараад байгаа юм. Вонын ханш хэдийгээр чангарсан ч импортын үнэтэй зэрэгцээд, экспортын бараа, бүтээгдэхүүн, үйлчилгээний үнэ буурсан байна. Өнгөрсөн наймдугаар сард энэхүү үзүүлэлт нэг жилийн өмнөх байдалтай харьцуулахад 2.2 хувиар буураад байсан бол есдүгээр сард бууралтын хурд нэмэгдэж, 4.6 хувь болжээ. Энэ нь мөн сүүлийн дөрвөн сарын хугацаан дахь хамгийн огцом уналт болсон юм. БНСУ-ын Төв банк өчигдөр бодлогын хүүгээ түүхэн доод хэмжээ болох 2.5 хувь дээр барих шийдвэрийг гаргаад байна.

Холбоо барих: minjma.g@bloombergtvmongolia.com