БНСУ-д шинээр бий болсон ажлын байрны тоо өнгөрсөн 2014 онд сүүлийн 12 жилийн дээд хэмжээндээ хүрчээ. Тус улсын Статистикийн хорооны мэдээлснээр 2014 онд тус улсад нийт 533 мянга орчим ажлын байр бий болсон байна. Энэ нь 2002 оноос хойших хамгийн өндөр дүн болжээ. Гэхдээ ажлын байрны тоо хурдацтай нэмэгдэж байгаа нь БНСУ-ын Төв банкны бодлогын хүүгийн шийдвэрт нөлөөлөхгүй гэж шинжээчид үзэж байна. Учир нь залуусын дунд ажилгүйдэл их байгаа нь хөдөлмөрийн зах зээлд бүтцийн бэрхшээл байгааг итгэж байна гэж “Investment & Securities Co"-ын шинжээч онцолжээ. Тус улсад 12 дугаар сард ажилгүйдэл 3.5 хувьтай байсан нь өмнөх сараас 0.1 хувиар нэмэгдсэн үзүүлэлт болсон байна. Түүнчлэн 11 дүгээр сард 513.7 их наяд вон байсан тус улсад өрхийн зээлийн хэмжээ 12 дугаар сард 519.1 их наяд болж нэмэгдсэнийг тус улсын Төв банкнаас мэдээллээ. Үүнийг үл хөдлөх хөрөнгийн журам зөөлөрсөн болон хүүгийн түвшин буурсан нь моргейжийн эрэлт нэмэгдэхэд нөлөөлснөөр тайлбарлаж байна. Мөн БНСУ-ын “М2" мөнгөний нийлүүлэлт 11 дүгээр сард 1.4 хувь өссөнөөр 2010 оны хоёрдугаар сараас хойших дээд хэмжээндээ хүрчээ.

Ц.Улам-Ундрах

Холбоо барих: ulamundrakh.ts@bloombergtvmongolia.com

minjma.g@bloombergtvmongolia.com