Сирид суугаа НҮБ-ын тусгай төлөөлөгч Саудын Араб, Ираны удирдлагатай уулзаж хоёр улс дипломат харилцаагаа тасалсан асуудлаар зөвлөлдөж, нөхцөл байдалд дүгнэлт өгөх болсон байна. НҮБ-ын дипломатч Стаффан Мистура мягмар гарагт Саудын Арабт очиж, энэ долоо хоногийн эцсээр Ираны удирдлагатай уулзах товтой байгаа юм. Саудын Арабын хууль хэрэгжүүлэгчид Шийтийн санваартан тэргүүтэй нийт 47 хүнийг цаазалснаар Ираны бухимдсан иргэд Саудын Арабын Элчин сайдын яамыг галджээ. Энэхүү үйл явдлыг дипломат зарчмыг зөрчсөн үйлдэл гэж үзсэнээр Саудын Араб, Ирантай дипломат харилцаагаа тасалсан юм. Гэхдээ гадаад худалдааны харилцаа тасрахгүй, урьдын адил үргэлжилнэ гэж дээрх хоёр улсын удирдлага мэдэгдсэн байна. Саудын Арабын шийдвэрийн дараа тус улсын холбоотон Бахрейн болон Судан Ирантай дипломат харилцаагаа таслахаа мөн мэдэгджээ. Гадаад харилцааны асуудлаас гадна НҮБ-ын төлөөлөгчийн айлчлалын хүрээнд Сирийн асуудлыг хөндөх төлөвтэй байна. Үүнээс өмнө Сирийн Ерөнхийлөгч Башар Ассадыг дэмжигч Иран, сөрөг хүчинд дэмжлэг үзүүлэгч Саудын Арабын тал иргэний дайны шийдлийг олох олон улсын хэмжээний хэлэлцээрт гурван удаа оролцож байсан юм. Харин дөрөв дэх удаагийн хэлэлцээр нэгдүгээр сарын 25-нд хийгдэх хүлээлттэй байна.

Б.Дашням

Холбоо барих: dashnyam.b@bloombergtvmongolia.com

minjma.g@bloombergtvmongolia.com