Өнгөрсөн нэгдүгээр сарын байдлаар барилгын гол нэр төрлийн бүтээгдэхүүний үнэ өмнөх сартай харьцуулахад тогтвортой байгаа ч зарим нэр төрлийн бүтээгдэхүүний үнэ өмнөх оны мөн үеэс 65 хүртэлх хувиар өссөн үзүүлэлттэй гарсан байна. Харин дотоодод үйлдвэрлэсэн хөнгөн бетоны үнэ өмнөх сартай харьцуулахад тогтвортой байгаа ч өмнөх оны мөн үеэс 31 хувиар өсчээ. Ялангуяа улаан тоосгоны үнэ өмнөх оны мөн үеэс 65 хувиар өссөн нь хамгийн өндөр үзүүлэлт болсон байна.

Засгийн газраас 2016 он гэхэд барилгын бүтээгдэхүүний дотоодын хэрэгцээний 70 хувийг үндэсний үйлдвэрлэлээр хангах зорилт тавьсны дагуу УИХ-аас Барилгын материалын үйлдвэрлэлийг дэмжих хөтөлбөрийг батлаад байгаа. Хөтөлбөрийн хүрээнд цемент, хөнгөн бетон зэрэг түүхий эдийн нөөц ихтэй зарим нэр төрлийн бүтээгдэхүүн үйлдвэрлэлийг нэмэгдүүлэх аж.

Монгол Улсын хувьд цаг уурын онцлогоосоо хамаарч барилгын салбар улирлын шинжтэй идэвхиждэг нь эдийн засгийн талаасаа барилгын материалын үйлдвэрлэлд хүндрэл дагуулдаг болохыг мэргэжилтнүүд онцлоод байгаа. Тэгвэл энэ асуудлыг шийдвэрлэх шинэ технологиудыг зарим үйлдвэрүүд үйл ажиллагаандаа нэвтрүүлж эхэлсэн байна. Тухайлбал, "Айзава Монгол" компани Японы JIS стандартыг нэвтрүүлснээр өвлийн улиралд ч бетон зуурмаг үйлдвэрлэх боломж нээгдсэн байна.