2013 онд дэлхийн хөгжиж байгаа орнуудаас хөрөнгө гадагшлах үзэгдэл хүчтэй ажиглагдсан талаар Монгол Улсын Санхүүгийн тогтвортой байдлын зөвлөлийн тайланд онцолсон байна. Үүний улмаас эдгээр орнуудын үндэсний валютын ханш огцом суларсан нийтлэг хандлага бий болжээ. Тухайлбал 2013 оны гуравдугаар улирал хүртэлх хугацаанд Монгол Улсын төгрөгийн нэрлэсэн ханш 9.5 хувиар суларсан ч энэ нь макро суурь нөхцөл болон түүний өөрчлөлттэй нийцтэй байна гэж тайланд онцолжээ. Харин 2012-2013 онд банкны систем дэх нөлөө бүхий банкуудын өөрийн хөрөнгийн зохистой харьцааг үе шаттайгаар 12 хувиас 14 хувь болгон нэмэгдүүлж, сайжруулсан юм. Мөн бүх банкуудын хувь нийлүүлсэн хөрөнгийн доод хэмжээг хоёр дахин нэмэгдүүлж, 16 тэрбум төгрөг болгосноор банкуудын өөрийн хөрөнгийн хүрэлцээ системийн хэмжээнд эрс сайжирч, эрсдэл даах чадвар нь нэмэгдсэн гэж Санхүүгийн тогтвортой байдлын зөвлөл үзжээ. Мөн банкны салбар хөрөнгийн гадагшлах урсгалаас үүдэлтэйгээр эрсдэлд орох магадлал харьцангуй бага байгааг онцолсон байна. Тухайлбал банкны салбарын нийт эх үүсвэрийн 5, 10 болон 15 хувь нь гадагшлахад банкуудын төлбөр түргэн гүйцэтгэх чадварын үзүүлэлт 3-9.9 нэгж хувиар буурах төсөөлөл гарсан нь Монголбанкны доод шаардлагаас 8.9-15.8 нэгж хувиар өндөр байгаа ажээ. Тиймээс цаашид банкны системийн хэмжээнд өнөөгийн төлбөрийн чадвараа хадгалах шаардлагатай гэж үзсэн байна. Гэхдээ зарим банкууд дахь зээлийн төвлөрөл өндөр байгаагаас гадна гадаад валютын зээлдэгчдийн ханшийн эрсдлийг бууруулах тогтолцоо бий болгох шаардлагатай байгааг дурджээ. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com